Վլադիմիր Պուտինը ապրիլի 24-ին ժամանելու է Երևան

ԵՐԵՎԱՆ, 12 ՄԱՐՏԻ, ԱՐՄԵՆՊՐԵՍ: Ռուսաստանի Նախագահ Վլադիմիր Պուտինը մասնակցելու է Հայոց ցեղասպանության 100-րդ տարելիցի ոգեկոչման արարողություններին։ «Արմենպրես»-ի հաղորդմամբ` այս մասին France Presse լրատվական գործակալության հետ զրույցում հայտնել է Վլադիմիր Պուտինի մամուլի խոսնակ Դմիտրի Պեսկովը։ «Այո, նա կթռչի Երեւան»,- նշել է Պեսկովը՝ հավելելով, որ Պուտինն այդ հարցը քննարկել է ՀՀ Նախագահ Սերժ Սարգսյանի հետ՝ մարտի 12-ին կայացած հեռախոսազրույցի ժամանակ:

2015թվականի մարտի 12-ին, ՀՀ նախագահ Սերժ Սարգսյանը հեռախոսազրույց է ունեցել Ռուսաստանի նախագահ Վլադիմիր Պուտինի հետ, որի ընթացքում երկու երկրների ղեկավարները համաձայնեցրել են իրենց առաջիկա հանդիպումների ծրագրերը՝ Հայոց ցեղասպանության 100-րդ տարելիցի եւ Հայրենական մեծ պատերազմում հաղթանակի 70-ամյակի կապակցությամբ անցկացվելիք միջոցառումներին համատեղ մասնակցության շրջանակներում: