1 րոպեի ընթերցում
ԵՐԵՎԱՆ, 11 ՄԱՐՏԻ, ԱՐՄԵՆՊՐԵՍ: Սիրիական բանակը մարտի 11-ին ազատագրել է 2 գյուղեր, որոնք գտնվում են երկրի հյուսիս-արևելքում՝ Ռաս ալ Այն քաղաքի մերձակայքում: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, ազատագրվել են Տուլան և Ալ Ամիր գյուղերը:
Թուրք-սիրիական սահմանի մոտ գտնվող Ռաս ալ Այն քաղաքում թեժ մարտեր են ընթանում ԻՊ ծայրահեղական կազմակերպության անդամների և քրդական ուժերի միջև: Երկու կողմերը տասնյակ կորուստներ են արձանագրել:
Քրդական աղբյուրների տեղեկացմամբ` մարտի 11-ին ահաբեկիչները լայնածավալ գործողություններ են սկսել Ռաս ալ Այն քաղաքի ուղղությամբ՝ օգտագործելով տանկեր, ծանր հրետանի:
Ռաս ալ Այն քաղաքը համարվում է քրդական մեծությամբ երրորդ քաղաքը Հասաքեից և Ղամիշլիից հետո, որը ահաբեկիչների համար Թուրքիայի տարածք մտնելու անցում է:
«Իսլամական պետություն» ծայրահեղական կազմակերպությունը համարվում է աշխարհի ամենավտանգավոր, ամենախոշոր և, միևնույն ժամանակ, ամենահարուստ ահաբեկչական կազմակերպությունը, որը կարճ ժամանակում հսկայական տարածքներ է գրավել Սիրիայում և Իրաքում: ԻՊ կազմակերպությունում ընդգրկվել են 80 երկրների մոջահեդներ: