Կանադացի խորհրդարանականը կոչ է անում վերջ տալ արյունահեղությանը ԼՂ հակամարտության գոտում

ԵՐԵՎԱՆ, 25 ՕԳՈՍՏՈՍԻ, ԱՐՄԵՆՊՐԵՍ: Կանադայի խորհրդարանի անդամ, հայ-կանադական բարեկամության խմբի նախագահ Հարոլդ Ալբրեխտի գնահատմամբ` օգոստոսի կեսերին Ադրբեջանի կողմից հարձակումները հանգեցրել են մի կետի, որը սպառնում է ապակայունացնել իրավիճակը տարածաշրջանում:

«Արմենպրես»-ի փոխանցմամբ` խորհրդարանականը հիշեցրել է, որ վերջին բախումների հետեւանքով զոհերի թիվը հասել է 30-ի:

«Կորստի նման չափ չէր արձանագրվել 1994թ. մայիսի 20-ին կնքված զինադադարից հետո»,- ասել է Ալբրեխտը:

«Այս ճգնաժամի լուծուման ուղին ռազմական տարբերակը չէ, եւ միջազգային իրավունքի նման կոպիտ խախտումները կարող են ավելի սաստկացնել ապագա սերունդների զայրույթը: Կանադայում վստահ են, որ նման խնդիրների լուծման լավագույն ուղին բանակցությունն ու երկխոսությունն է: Ժամանակն է, որ տարածաշրջանի առաջնորդները հետամուտ լինեն, որ հաստատվի խաղաղություն եւ երկխոսություն: Չափից շատ արյուն է հոսել ոչ լավ բանի համար»,- նշել է խորհրդարանականը:

Նա հույս է հայտնել, որ օգոստոսի 10-ին Սոչիում կայացած Սերժ Սարգսյան-Իլհամ Ալիեւ հանդիպումը կարող է նվազեցնել հակամարտության լարվածության աստիճանը տարածաշրջանում: