2 րոպեի ընթերցում
ԵՐԵՎԱՆ, 10 ՀՈՒՆԻՍԻ, ԱՐՄԵՆՊՐԵՍ: Սիրիայի Նախագահ Բաշար ալ Ասադը հունիսի 10-ին ընդունել է նախագահի նախկին թեկնածու Հասան ան Նուրիին: Ինչպես հաղորդում է «Արմենպրես»-ը, վկայակոչելով սիրիական ՍԱՆԱ գործակալությունը, հանդիպման ընթացքում Նուրին նշել է, որ նախագահական ընտրություններն ընթացել են արդար և թափանցիկ, և դա կարևոր քայլ էր ժաղովրդավարության հասնելու ճանապարհին: Նա նաև ավելացրել է, որ տասնամյակներ ի վեր դրանք առաջին այլընտրանքային ընտրություններն էին:
Իր հերթին Նախագահ Ասադը նշել է, որ նախագահական ընտրությունների հաջողությունը և քաղաքացիների ցուցաբերած ակտիվությունը ցույց են տալիս սիրիական ազգի ուժը և նրա ցանկությունը՝ ազատ արտահայտելու իր որոշումը, չնայած դժվարին պայմաններին, որում ապրում է Սիրիան:
Սիրիայի Նախագահը նաև ընդունել է նախագահի մյուս թեկնածու Մահեր Հաջարին: Վերջինս նշել է, որ սիրիական ժողովուրդը մեծ վստահություն ունի Բաշար ալ Ասադի հանդեպ՝ հաստատելով, որ ազգը վճռական է տրամադրված ահաբեկչության դեմ պայքարի հարցում` մինչև կայունության և անվտանգության հաստատումը, և վստահ քայլելու է դեպի ավելի բարեկեցիկ ապագա:
Սիրիայում հունիսի 3-ին կայացած նախագահական ընտրություններում ձայների մեծամասնությամբ հաղթել էր Բաշար ալ Ասադը՝ ստանալով ձայների 88,7 տոկոսը: