1 րոպեի ընթերցում
ԵՐԵՎԱՆ, 17 ՄԱՐՏԻ, ԱՐՄԵՆՊՐԵՍ: Սիրիայի հարցերով ՄԱԿ-ի և Արաբական երկրների լիգայի հատուկ բանագնաց Ախդար Իբրահիմին մեկնել է Թեհրան՝ քննարկելու սիրիական ճգնաժամի զարգացումները և ժնևյան համաժողովի վերաբերյալ հարցեր: Երկօրյա այցի շրջանակներում նախատեսված են հանդիպումներ Իրանի Նախագահի և վարչապետի հետ:
Ինչպես հաղորդում է «Արմենպրես»-ը` վկայակոչելով արաբական լրատվամիջոցները, Իբրահիմին հանդիպել է Իրանի ազգային անվտանգության խորհրդի գլխավոր քարտուղար Ալի Շամխանիի հետ: Իրանի արտգործնախարար Մուհամմադ Ջավադ Զարիֆը հայտարարել է, որ Իրանի դռները մշտապես բաց են Իբրահիմիի առջև: Նա ողջունել է Իբրահիմիի ջանքերը Սիրիայում խաղաղություն վերականգնելու ուղղությամբ:
Իբրահիմիի կարծիքով` Սիրիայում նախագահական ընտրություններ անցկացնելու քայլը սպառնում է ընդդիմության և գործող համակարգի միջև բանակցություններին և քաղաքական գործընթացին:
Ժնևյան համաժողովից առաջ մասնակցության հրավեր էր ուղարկվել նաև Իրանին, սակայն հրավերը չեղյալ է համարվել Սիրիայի ընդդիմության և ԱՄՆ-ի քննադատություններից հետո:
Երկօրյա այցի շրջանակներում նախատեսված են հանդիպումներ Իրանի Նախագահի և վարչապետի հետ:
Տաթևիկ Հարությունյան