Սիրիայի ընդդիմությունը և իշխանությունները համաձայնության են եկել Հոմս քաղաքում մարդասիրական օգնություն ցուցաբերելու վերաբերյալ
1 րոպեի ընթերցում
ԵՐԵՎԱՆ, 6 ՓԵՏՐՎԱՐԻ, ԱՐՄԵՆՊՐԵՍ: Սիրիայի իշխանությունները և ընդդիմությունը համաձայնության են եկել Հոմս քաղաք մարդասիրական օգնություն հասցնելու վերաբերյալ: Ինչպես հաղորդում է «Արմենպրես»-ը, վկայակոչելով ռուսաստանյան լրատվամիջոցները, այս մասին փետրվարի 6-ին հայտարարել է Ռուսաստանի արտաքին գործերի փոխնախարար Ալեքսանդր Լուկաշևիչը: «Որոշվում է Հոմսի հին թաղամասեր մարդասիրական օգնություն հասցնելու հարցը»,- նշել է Լուկաշևիչը՝ հավեելով, որ դա միանգամայն դրական քայլ է: Մոսկվան չի կասկածում, որ Սիրիան սահմանված ժամկետում երկրից դուրս կբերի քիմիական զենքը:
«Չնայած թունավոր նյութերի դուրս բերման դժվարություններին, դեռ հիմք չկա կասկածի տակ դնել սահմանված ժամկետները»,- ասել է Լուկաշևիչը:
Ավելի վաղ ՄԱԿ-ի գլխավոր քարտուղար Պան Կի Մունը հայտարարել էր, որ ապստամբների պարբերաբար հարձակումները խանգարում են մարդասիրական օգնություն հասցնել երկրի բնակչությանը: Նրա խոսքով` վերջին ամիսների ընթացքում ապստամբները սպանել և վիրավորել են ՄԱԿ-ի մարդասիրական կառույցի տասնյակ աշխատակիցների, ինչպես նաև թալանել մթերքներով բեռնված բեռնատարները: