Վարդան Պետրոսյանի փաստաբանը հերքում է տուժողի ներկայացուցչի` խմածության և բարձր արագության հետ կապված հայտարարությունները

ԵՐԵՎԱՆ, 18 ԴԵԿՏԵՄԲԵՐԻ, ԱՐՄԵՆՊՐԵՍ: Դերասան Վարդան Պետրոսյանը վթարից հետո անցել է փորձաքննություն, որի համաձայն` նա ալկոհոլ չի օգտագործել: Փորձագետները որոշել են, որ դերասանի վարած մեքենայի արագությունը 71-73 կիլոմետր/ժամ միջակայքում է եղել: Այս մասին«Արմենպրես»-ի հետ զրույցում նշեց Վարդան Պետրոսյանի փաստաբան Նիկոլայ Բաղդասարյանն՝ անդրադառնալով տուժող կողմի ներկայացուցիչ, փաստաբան Ռուբեն Բալոյանի հնչեցրած հայտարարություններին` Վարդան Պետրոսյանի խմածության և ավտոմեքենայի բարձր արագության մասին:

Բաղդասարյանը նշեց, որ ՀՀ կառավարությունը սահմանել է ալկոհոլի օգտագործումը ստուգելու եղանակը: «Խմածությունը ստուգվում է բացառապես արտաշնչած օդի, արյան և մեզի փորձաքննության միջոցով: Սա կառավարության որոշմամբ սահմանված կարգն է: Կարգի համաձայն` «Նաիրի» բժշկական կենտրոնում կատարվել է ստուգում օդի արտաշնչման միջոցով և տրվել է եզրակացություն, որ նա սթափ վիճակում է»,- ասաց Բաղդասարյանը՝ հավելելով, որ նաև մեզի և արյան փորձաքննություն է նշանակվել, սակայն ժամանակը շատ անցած լինելու պատճառով հնարավոր չի եղել այդ կերպ որևէ բան որոշել: «Մեր Կառավարության որոշմանը համապատասխան ստուգումների արդյունքում որոշվել է, որ Վարդան Պետրոսյանը գտնվում է սթափ վիճակում»,- ասաց Բաղդասարյանը:

Անդրադառնալով բժշկի կողմից հայտնած կասկածին, թե Պետրոսյանի վրայից ալկոհոլի հոտ է գալիս և պետք է ստուգել խմածությունը՝ փաստաբանը նշեց. «Իմ գործերով, որպես կանոն, միշտ նման կասկած բժիշկները հայտնում են: Ես չեմ հիշում մի գործ, որտեղ խմածությունը ստուգելու խնդիր չլինի»,- նշեց փաստաբանը: Նա ասաց, որ «Էրեբունի» բժշկական կենտրոնում, պաշտոնական գրության համաձայն, խմածությունը չի ստուգվել:

Անդրադառնալով ավտոմեքենայի արագությանը՝ նա նշեց, որ դա որոշվել է դատաավտոտեխնիկական փորձագետների կողմից: «Մեզ մոտ առկա տեխնոլոգիաներով հնարավորություն չկա որոշելու ստույգ արագությունը, որոշվում է նվազագույն արագությունը, որն արձանագրվել է 71 կիլոմետր/ժամ: Հնարավոր է, որ լինի 72-73 կմ/ժ»,- ասաց փաստաբանը՝ հավելելով, որ համապատասխան տեխնոլոգիաների բացակայությամբ պայմանավորված, փորձագետները հնարավոր են համարում նման արագությունը:

Փաստաբանը նշեց, որ վթարի մոդելը ինքը դեռ ցույց չի տվել: «Ես ոչ քառասունքին, ոչ էլ քառասունքից առաջ մոդելավորումը երեխաներին ցույց չեմ տվել: Ես չգիտեմ` ինչու է Բալոյանը նման բան ասել»,- ասաց փաստաբանը՝ հավելելով, որ տուժող կողմի ներկայացուցիչ, փաստաբան Ռուբեն Բալոյանն իր ընկերն է, լավ փաստաբան է և բոլոր փաստաբանները պետք է պահպանեն վարքագծի կանոններն ու ընկերական հարաբերությունները:

Հոկտեմբերի 20-ին, ժամը 22:22-ին, Եղվարդ-Երևան ավտոճանապարհին` կամրջի մոտ, տեղի էր ունեցել ավտոպատահար: Դեռևս չբացահայտված հանգամանքներում Եղվարդ-Երևան ավտոճանապարհի 2-րդ կիլոմետրին բախվել են «ՎԱԶ-2121» և «ԲՄՎ» մակնիշի ավտոմեքենաները: Մահացել են Էդգար եւ Էդուարդ Հակոբյանները: Վթարի ենթարկվածմյուսանձը` Տաթեւ Հակոբյանըլուրջմարմնականվնասվածքներէրստացել: Հրշեջ-փրկարարները «ԲՄՎ» մակնիշի ավտոմեքենայից դուրս էին բերել վարորդին`1959թ. ծնված Վարդան Պետրոսյանին: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասով` ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ:Նրանկատմամբ Կոտայքի մարզի ընդհանուր իրավասությանդատարանըկիրառելէերկամսյակալանք,իսկ Վերաքննիչ դատարանը չի բավարարելբողոքարկմանդիմումը: