1 րոպեի ընթերցում
ԵՐԵՎԱՆ, 12 ԴԵԿՏԵՄԲԵՐԻ, ԱՐՄԵՆՊՐԵՍ: Սիրիական Ադրա քաղաքում զինյալների կողմից իրականցված մասսայական սպանությունների զոհ է դարձել ավելի քան 50 մարդ: Ինչպես հաղորդում է «Արմենպրես»-ը, վկայակոչելով արաբական լրատվամիջոցները, շուրջ 200 բնակիչներ գերի են ընկել: Սիրիական լրատվամիջոցների տեղեկացմամբ` «Ջաբհա ան Նուսրա» և «Իսլամական ճակատ» խմբավորման անդամները չեն խնայել ոչ կանանց, ոչ երեխաներին:
Սիրիական ՍԱՆԱ գործակալության տեղեկացմամբ` սիրիական բանակին հաջողվել է վերականգնել քաղաքի նկատմամբ հսկողությունը:
«Ջաբհա ան Նուսրա» խմբավորման ավելի քան 1000 անդամներ դեկտեմբերի 11-ին հարձակվել են Դամասկոսի մերձակայքում գտնվող Ադրա քաղաքի վրա: Զինյալները հարձակումն իրականացրել են մառախլապատ եղանակին: Քաղաքի գլխավոր հսկիչ-անցագրային կետի վրա հսկողություն հաստատելուց հետո նրանք մտել են քաղաքի փողոցները, ապա հարձակվել ոստիկանական բաժանմունքի վրա և հսկողություն հաստատել նաև այնտեղ:
Դամասկոսից 20 կմ հեռավորության վրա գտնվող Ադրա քաղաքում բնակվում է 100 հազարից ավելի մարդ, այդ թվում` ալավիներ: