3 րոպեի ընթերցում
ԳՅՈՒՄՐԻ, 1 ՕԳՈՍՏՈՍԻ, ԱՐՄԵՆՊՐԵՍ: Ճանաչողական այցով օգոստոսի 1-ին Գյումրիում էր Հայաստանում Գերմանիայի նորանշանակ դեսպան Ռայներ Մորելը: Այցի շրջանակներում դեսպանը հանդիպումներ ունեցավ Գյումրու քաղաքապետ Սամվել Բալասանյանի եւ Շիրակի մարզպետ Ֆելիքս Ցոլակյանի հետ:
Սամվել Բալասանյանը, ողջունելով հյուրին, հույս հայտնեց, որ նորանշանակ դեսպանը կշարունակի Գերմանիայի նախկին դեսպանի բարի հարաբերությունների լավ ավանդույթը եւ պարբերաբար կայցելի Գյումրի: Ի դեպ, Գյումրիում գործող «Բեռլին»հյուրանոցի եւ «Բեռլին» մոր ու մանկան կենտրոնի աշխատանքներին դեսպանը հասցրել էր ծանոթանալ: «Բեռլին» հյուրանոցում տեսածը տպավորել էր Մորելին: Քաղաքապետի հետ ունեցած հանդիպման ընթացքում անդրադարձ եղավ Գյումրու խնդիրներին: Բալասանյանը հյուրին ներկայացրեց ոչ միայն քաղաքի խնդիրները բնակարանային եւ գործազրկության, այլ նաեւ պատմամշակութային արժեքները: Մորելի խնդրանքով Սամվել Բալասանյանը մանրամասնեց անօթեւանության խնդրին ու Գրյումրու արդյունաբերական կարողությունները: Խոսելով երկուստեք հետաքրքրություն ներկայացնող ոլորտներից Գյումրու քաղաքապետն առանձնացրեց զբոսաշրջությունը: «Կարծում եմ, որ զբոսաշրջությունն այն ոլորտն է, որտեղ մենք կարող են ընդհանուր հայտարարի գալ: Որպես մշակութային մայրաքաղաք Գյումրին կարող է զբոսաշրջիկներ ընդունել եւ ներկայացնել իր ներուժը: Այս ոլորտում Դուք խորհուրդներով օգտակար կլինեք: Կարծում են համագործակցությունն այստեղ կստացվի»,- նշեց Բալասանյանը:
Գյումրու քաղաքապետն առաջարկեց նաեւ գերմանական տեխնոլոգիաներով որեւէ արտադրություն ստեղծել Գյումրիում: Ներկայացվեց նաեւ Գյումրին եւ գերմանական որեւէ քաղաք քույր-քաղաքներ հռչակելու առաջարկը: Զրույցի ընթացքում դեսպանին ուրախացրեց այն, որ սիրիահայ մի քանի ընտանիք ցանկություն է հայտնել գալ եւ բնակվել Գյումրիում, իսկ քաղաքապետարանը փորձում է աջակցել նրանց: «Ուրախ եմ այդ կապակցույամբ: Դա նշանակում է , որ նրանք իրենց ապագան պատկերացնում են այս քաղաքում: Նրանք եւս կարող են օգուտ բերել այս քաղաքին»,- նշեց Մորելը:
Հանդիպման ավարտին Սամվել Բալասանյանը եւ Ռայներ Մորելը փոխանակեցին հուշանվերներ: «Գյումրին շատ հետաքրքիր քաղաք է, ունի հետաքրքիր մշակութային պատմություն: Այստեղ կա շատ զարգացած մշակութային հարթակ»,- լրագրողներին իր ացի տպավորթյունները ներկայացրեց դեսպանը: