Վիկ Դարչինյանը ցանկանում է հաղթել Նոնիտո Դոներին եւ կրկին նվաճել աշխարհի չեմպիոնի տիտղոսը

ԵՐԵՎԱՆ, 25 ՀՈՒՆԻՍԻ , ԱՐՄԵՆՊՐԵՍ: Lեգենդար հայ պրոֆեսիոնալ բռնցքամարտիկ, սիրողական բռնցքամարտի աշխարհի գավաթակիր եւ բազմաթիվ մրցաշարերի հաղթող ու մրցանակակիր 48կգ եւ 52կգ քաշային կարգերում, պրոֆեսիոնալ բռնցքամարտի երեք միջազգային ֆեդերացիաների վարկածով աշխարհի չեմպիոն, աշխարհի բացարձակ չեմպիոն 37-ամյա վանաձորցի մարզիկ Վախթանգ-Վիկ Դարչինյանը, ով հունիսի 24-ին Հայաստան Է ժամանել, բացառիկ հարցազրույց է ունեցել «Արմենպրես»-ի հետ:

-Վիկ, նորից բարի գալուստ Հայաստան, ինչպիսի՞ն են քո առաջիկա ծրագրերը:

- Նախ եւ առաջ ուրախ եմ տեղեկացնել Հայաստանի մարզասերներին, որ մտադիր եմ շարունակել իմ կարիերան պրոֆեսիոնալ ռինգում եւ արդեն նոր պայմանագիր եմ կնքել պրոֆեսիոնալ բռնցքամարտի առաջատար պրոմոութերներից մեկի՝ ամերիկացի Բոբ Առումի հետ երկու տարվա մրցելույթների վերաբերյալ:

-Քո առաջիկա մրցակցի անունն արդեն հայտնի՞Է:

-Այո, հայտնի Է, նրա անունը ձեզ նույնպես լավ Է հայտնի :

-Նոնիտո Դոնե՞րը:

-Այո, ֆիլիպինցի Նոնիտո Դոները, ում հետ ռեւանշի մրցամարտի մասին երկար եմ երազել: Այս անգամ նա համաձայնել Է մրցել ինձ հետ, եւ մեր մրցամարտը, ըստ անենայնի, տեղի կունենա սեպտեմբեր-հոկտեմբեր ամիսներին:

Հատուկ նշեմ, որ ես մրցելու եմ ինձ համար նոր՝ 55,8կգ քաշային կարգում, շատ եմ ցանկանում ոչ միայն նորից նվաճել աշխարհի չեմպիոնի տիտղոսը, այլեւ դա անել ինձ համար նոր քաշային կարգում, (մինչ այդ ես մրցել եմ 48 եւ 52կգ քաշային կարգերում):

-Մարզասերներն այնքան են սովորել քո հաղթանակներին, որ չեն համակերպվել այն մտքին, որ դու աշխարհի գործող չեմպիոնը չես:

-Ես շատ եմ ցանկանում շուտով լրացնել այդ բացը:

-Վախթանգ, հնարավո՞ր Է, որ քո ապագա մրցամարտերից որեւէ մեկը նորից տեղի ունենա Երեւանում, ինչպես մեկ անգամ եղավ, եւ դա իսկական սենսացիա Էր դարձել:

-Իհարկե, հնարավոր Է, եւ ես ինքս շատ եմ ձգտում դրան, բայց վերջերս իմ ուշքն ու միտքը պայմանագիր կնքելն Էր, եւ այլ թեմաների շուրջ մտածելու ժամանակ չունեի: Ասեմ նաեւ, որ դա մեծ գումարների հետ Է կապված, բայց շատ արժանի միջազգային միջոցառում Է եւ մեծ հեղինակություն կբերի հայկական սպորտին: Իսկ ինձ համար շատ հաճելի Է մրցել հայրենիքում:

- Հայաստանում բռնցքամարտի մարզադպրոց բացելու քո գաղափարն ուժի մե՞ջ Է մնում:

-Իհարկե, նաեւ հույս ունեմ , որ այն լայն աջակցություն կստանա Հայաստանում, դա լուրջ աշխատանք Է եւ մեր բռնցքամարտին մեծ օգուտ կբերի: Ինչպես ասացի` մինչ այժմ զբաղված Էի պայմանագիր կնքելով, ցանկանում Էի նորից ռինգ դուրս գալ աշխարհի չեմպիոնի տիտղոսը վիճարկելու համար, այս խնդիրը լուծված Է, այնպես որ փուլ առ փուլ կզբաղվենք բոլոր հարցերի լուծմամբ:

- Դո՞ւ գոհ ես քո այժմյան մարզավիճակից:

-Այո, ես լավ մարզավիճակում եմ եւ հիմա, իմանալով իմ ապագա մրցակցին,ավելի նպատակասլաց կմարզվեմ, մտքերս միայն հաղթանակի մասին են:

-Վախթանգ, դու նախ եւ առաջ ճանաչման ես արժանացել սիրողական ռինգում եւ այնուհետեւ տեղափոխվել պրոֆեսիոնալ բռնցքամարտ: Ի՞նչ կասես սիրողակական բռնցքամարտի միջազգային ֆեդերացիայի՝ ԱԻԲԱ-ի` արդեն առաջիկա միջազգային մրցումներում պրոֆեսիոնալ բռնցքամարտիկների ելույթները թույլ տալու որոշման մասին:

-Միանշանակ ճիշտ որոշում Է: Նման քայլի պետք Էր ավելի շուտ դիմել: Դրանից կշահի բռնցքամարտը, այն շատ ավելի դիտարժան կդառնա, եւ կշահեն բռնցքամարտիկները` ավելի հետաքրքիր մրցաշարերի մասնակցելով: Բացի դրանից,պետք չԷ մոռանալ, որ բռնցքամարտը նույնպես մասնագիտություն Է, եւ սիրողական բռնցքամարտի միջազգային ֆեդերացիայի նման որոշումը թույլ կտա շատ բռնցքամարտիկների նաեւ որոշ գումար աշխատել: Հաշվի առնենք, որ Հայաստանի մարզիկների համար սա նույնպես ցանկալի որոշում Է՝ մենք ունենք լավ հեռանկարներ եւ սիրողական, եւ պրոֆեսիոնալ բռնցքամարտում:

-Վախթանգ, ստացվել Է այնպես, որ դու միաժամանակ ապրում ես երեք մայրցամաքներում:

-Այո, այդպես Է ստացվել: Հայաստանն իմ տունն Է, Ավստրալիայում ես բնակվում եմ, իսկ Միացյալ Նահանգներում անցկացնում եմ իմ մրցամարտերը: Ի դեպ, Ավստրալիայում մենք` հայերս, հաճախ ենք շփվում միմյանց հետ: Ես միշտ զգում եմ հայ մարզասերների աջակցությունը եւ Ավստրալիայում, եւ ԱՄՆ-ում , եւ այլ երկրներում, բայց, իհարկե, նախ եւ առաջ՝ Հայաստանում:

Զրույցը վարեց Զավեն Վարդանյանը