2 րոպեի ընթերցում
ԵՐԵՎԱՆ, 25 ՓԵՏՐՎԱՐԻ, ԱՐՄԵՆՊՐԵՍ: Հալեպի արվարձաններից մեկում նախորդ շաբաթվա ընթացքում առեւանգված հայազգի Ներսես Աղայանն ազատ է արձակվել: Հալեպահայերից ստացված տեղեկությունների համաձայն` նա ազատ է արձակվել փրկագին վճարելուց հետո: Ավելի վաղ հայտնի էր դարձել, որ փետրվարի 20-ի երեկոյան հանրային տրանսպորտից առեւանգվել էր մոտ վաթսուն տարեկան Ներսես Աղայանը: Զինյալները կանգնեցրել էին տրանսպորտը, սկսել էին ստուգել ուղեւորների անձնագրերը, որից հետո Ներսես Աղայանին իջեցրել էին ու տարել անհայտ ուղղությամբ:
Անցնող երկու օրերին Հալեպի կենտրոնական եւ, մասնավորապես, հայկական թաղամասերում իրավիճակը համեմատաբար հանգիստ է եղել: Այս մասին«Արմենպրես»-ի հետ զրույցում նշեց Բերիո թեմի ազգային առաջնորդարանի մամուլի քարտուղար Ժիրայր Ռեյիսյանն` ավելացնելով, որ թեպետ սովորական դարձած ռմբակոծության ձայները լսելի են, այնուամենայնիվ, մեծ փոփոխություններ քաղաքում տեղի չեն ունեցել: Նա նաեւ ավելացրեց, որ հակասական լուրեր են շրջանառվում, թե բանակը եւ ընդդիմությունը որոշակի հաջողությունների են հասել Հալեպում:
ՄԱԿ-ի տվյալներով` Սիրիայում շուրջ 23 ամիս շարունակվող բախումների հետեւանքով զոհերի թիվը հասել է շուրջ 70 հազարի, այդ թվում` զոհված հայերի թիվը գերազանցում է չորս տասնյակը: