Հալեպի հայկական թաղամասերում գիշերվա ընթացքում եւ առավոտյան ռումբերի ձայներ են լսվել. Ժիրայր Ռեյիսյան
1 րոպեի ընթերցում
ԵՐԵՎԱՆ, 15 ՀՈւՆՎԱՐԻ, ԱՐՄԵՆՊՐԵՍ: Հալեպում հունվարի 15-ի գիշերը ռումբերի ձայները չեն դադարել եւ ընդհատումներով շարունակվել են նաեւ առավոտյան: Դրանք լսելի են եղել նաեւ հայկական թաղամասերում: Այս մասին «Արմենպրես»-ի հետ զրույցում նշեց Բերիո թեմի ազգային առաջնորդարանի մամուլի քարտուղար Ժիրայր Ռեյիսյանն` ավելացնելով, որ կոնկրետ տեղեկություններ չկան, թե ռմբակոծությունները որ թաղամասերում են եղել:
Հայկական Նոր Գյուղ թաղամասում, Ռեյիսյանի խոսքով, փոփոխություններ տեղի չեն ունեցել, սակայն դիպուկահարի փամփուշտից վիրավորված հայի դեպքից հետո բնակիչներն ավելի զգոն են դարձել եւ ավելի ուշադիր:
Ինչ վերաբերում է երկու օր առաջ դիպուկահարի գնդակից վիրավորված հային, ապա Ռեյսիյանը տեղեկացրեց, որ բժիշկների խոսքով երկար ժամանակ կպահանջվի նրան ոտքի կանգնելու համար: Փամփուշտն, ինչպես հայտնի է, լուրջ վնասվածք էր հասցրել մեր հայրենակցի ոտքին, եւ այն, բարեբախտաբար, չի հեռացվել:
Մամուլի քարտուղարը նաեւ նշեց, որ վերջին երկու օրերին Հալեպում եղանակը համեմատաբար մեղմացել է:
Սիրիայում շուրջ 22 ամիս շարունակվող բախումների հետեւանքով ՄԱԿ-ի տվյալներով զոհվել են մոտավորապես 60 հազար մարդ, այդ թվում` չորս տասնյակից ավելի հայեր: