1 րոպեի ընթերցում
ԵՐԵՎԱՆ, 28 ԴԵԿՏԵՄԲԵՐԻ, ԱՐՄԵՆՊՐԵՍ: Թուրքիայի փոխվարչապետ Ալի Բաբաջանը հայտարարել է, որ 2013 թվականը Թուրքիայի տնտեսության համար «կարեւոր, բայց խիստ ճգնաժամային ժամանակաշրջան» է լինելու: Այս մասին, ինչպես հաղորդում է «Արմենպրես»-ը, հայտնում է «Անատոլու» լրատվական գործակալությունը:
«2013 թվականը Թուրքիայի համար խիստ ճգնաժամային կլինի այն առումով, որ հենց մեր տարածաշրջանում` Եվրոպայում, Մերձավոր Արեւելքում, Հարավային Աֆրիկայում քաղաքական եւ տնտեսական խնդիրներ կան, Սիրիայում ներքին պատերազմ է ընթանում: Դրանք բոլորը կազդեն Թուրքիայի վրա», -ասել է նա:
Նշելով, որ նման պայմաններում կարեւոր է, որ Թուրքիան պահպանի տնտեսական զարգացման տեմպերը, Բաբաջանը կանխատեսել է, որ թուրքական տնտեսության մեջ առկա ֆինանսական ճեղքվածքի հարցը չի լուծվի եկող տարի եւս: «Ներմուծման եւ արտահանման միջեւ ճեղքվածքն այլեւս նույն արագությամբ չի նվազելու: Ենթադրվում է, որ անգամ 2015 թվականին ընթացիկ տնտեսական ճեղքվածքը կլինի 6,5 տոկոսի շրջանակում», -նշել է Թուրքիայի էկոնոմիկայի գծով փոխվարչապետը: