Human Rights Watch-ը կոչ է արել Թուրքիային` չխոչընդոտել համացանցից օգտվելու ազատությանը
2 րոպեի ընթերցում
ԵՐԵՎԱՆ, 22 ԴԵԿՏԵՄԲԵՐԻ, ԱՐՄԵՆՊՐԵՍ: Մարդու իրավունքների պաշտանության միջազգայինկազմակերպությունը`Human Rights Watch (HRW), կոչ է արել Թուրքիայի կառավարությանը` չսահամանափակել քաղաքացիների` համացանցից օգտվելու ազատությունը: Ինչպես հաղորդում է «Արմենպրես»-ը, այս մասին տեղեկացնում է թուրքական «Հուրիեթ» պարբերականը:
«Դադարեցրեք ինտերնետային կայքերին միանալու հնարավորության անօրինական արգելափակումը»,- ասվում է միջազգային կազմակերպության արած հայտարարության մեջ: Human Rights Watch-ի աշխատակից Սինտիա Վոնգը, անդրադառնալով այս խնդրի կապակցությամբ Մարդու իրավունքների եվրոպական դատարանի կողմից Թուրքիային դատապարտող որոշման ընդունմանը, նշել է, որ եվրոպական դատարանի կայացրած որոշումը կարևոր և հզոր ուղերձ է խոսքի ազատության պաշտպանության համար:
Ավելի վաղ ՄԻԵԴ-ը Թուրքիային պատժել էր Ինտերնետի օգտատերերի` ցանցի հետ կապի իրավունքը խախտելու համար: Եվրոպական դատարանը վճռել էր, որ Թուրքիայի թիվ 5651` «Ինտերնետ միջավայրում հրապարակումների կարգավորման եւ այդ հրապարակումների` որպես հանցագործությունների դեմ պայքարի մասին» օրենքը հակասում է արտահայտվելու ազատությանը, ինչով Թուրքիայում սահմանափակվել էր քաղաքացիների` ինտերնետում հրապարակումներ կատարելու իրավունքը:
ՄԻԵԴ-ը բավարարել էր Թուրքիայի քաղաքացի Ահմեդ Յըլդըրըմի 2009 թ-ի հունիսի 24-ին ներկայացրած հայցը, որով նա թուրքական իշխանություններին մեղադրել էր իր անձնական կայքի էջերի հրապարակմանը խոչընդոտելու մեջ: ՄԻԵԴ-ը վճռել էր, որ թուրքական իշխանությունների այդ գործողությունը հակասում է խոսքի եւ արտահայտվելու ազատությանը, ինչի համար թուրքական կառավարությունը պետք է 7500 եվրոյի փոխհատուցում տրամադրի Յըլդըրըմին, եւս հազար եվրո էլ վճարի դատարանի ծախսերի դիմաց: