2 րոպեի ընթերցում
ԵՐԵՎԱՆ, 20 ԴԵԿՏԵՄԲԵՐԻ, ԱՐՄԵՆՊՐԵՍ: Հալեպում մի քանի օր առաջ կրկին հայ է առեւանգվել: Այս մասին «Արմենպրես»-ին տեղեկացրեց Բերիո թեմի ազգային առաջնորդարանի մամուլի քարտուղար Ժիրայր Ռեյիսյանն` ավելացնելով, որ առեւանգվածը Շահե Չաղլասյանն է: Նրա խոսքով` Չաղլասյանի ազատ արձակման համար փրկագին է պահանջվում: Հայտնի է, որ նա Հալեպի ծայրամասում գտնվող Շքեյֆ շրջանում էառեւանգվելիր իսկ մեքենայով: Այժմ աշխատանքներ են տարվում նրան ազատ արձակելու ուղղությամբ:
Անդրադառնալով Հալեպում տիրող ընդհանուր իրավիճակին` Ռեյիսյանը տեղեկացրեց, որ մեծ փոփոխություններ տեղի չեն ունեցել: Դրական փոփոխությունը երեկվա համեմատ փոքր-ինչ ավելի երկար ժամանակով էլեկտրականություն ունենալն է: Կրակոցներ եւ պայթյուններ մերթ ընդ մերթ լսելի են, սակայն ընդհանուր առմամբ քաղաքն ավելի հանգիստ է: Առավել անհանգստացնող խնդիրները կենցաղային բնույթի են:
Ինչ վերաբերում է Սիրիայի մայրաքաղաք Դամասկոսում տիրող իրավիճակին, ապա լարվածությունը դեռեւս շարունակվում է հատկապես Յարմուքի շրջանում:
Արաբական լրատվամիջոցներից ստացված տեղեկությունների համաձայն` մոտ երկու հազար մարդ երեք օրվա ընթացքում հատել է Լիբանանի սահմանը:
Սիրիայում շուրջ 21 ամիս շարունակվող բախումների հետեւանքով զոհվել է մոտավորապես 40 հազար մարդ: