Առեւանգված հայերին ազատ արձակելու ուղղությամբ բանակցությունները շարունակվում են

ԵՐԵՎԱՆ, 7 ՆՈՅԵՄԲԵՐԻ, ԱՐՄԵՆՊՐԵՍ: Բեյրութից Հալեպ տանող ճանապարհին առեւանգված հայերի վիճակը դեռեւս անորոշ է: Այս մասին«Արմենպրես»-ին տեղեկացրեց հալեպահայ համայնքի ներակայացուցիչ Հրայր Ագուիլյանն` ավելացնելով, որ շարունակվում են բանակցությունները նրանց ազատ արձակելու ուղղությամբ:Նրա խոսքով` Հալեպում նոյեմբերի 7-ի առավոտյան իրավիճակը հանդարտ է հատկապես հայաբնակ թաղամասերում: Կառավարական բանակը հսկում է թաղամասերը, սակայն չի բացառվում, որ ամեն վայրկյան հանդարտ վիճակը կարող է վտանգավոր դրության վերածվել:

«Հալեպահայը պատրաստ չէր այսպիսի օրերի, մենք ապրում էինք հանգիստ, հանդարտ կյանքով: Արդեն չորս ամիս է` հալեպահայերն անգործ են, եւ աշխատավայրերը` փակ: Ունեցած մի փոքր գումարով փորձում ենք առօրյա կարիքները հոգալ, բայց մինչեւ երբ կկարողանանք դիմանալ, Աստված գիտի»,- նշեց Հրայր Ագուիլյանը:

Նա նաեւ ավելացրեց, որ դրական փոփոխություններ չկան, ամենուրեք ավերված շինություններ են, հայեր են նահատակվում: Հալեպահայության անորոշ եւ անկայուն վիճակը շարունակվում է` կարիք ունենալով հոգեբանական եւ բարոյական օժանդակության:

Սիրիայում ավելի քան 18 ամիս շարունակվող բախումների հետեւանքով զոհվել է 30 հազարից ավելի մարդ, այդ թվում` չորս տասնյակից ավելի հայեր: Իսկհոկտեմբերի 29-ի երեկոյան 18:00-ի սահմաններում զինյալները Բեյրութից Հալեպ ուղեւորվող «Զեյթունի Դրուզ» ընկերությանը պատկանող քաղաքացիական ավտոբուս են կանգնեցրել Հալեպի մոտակայքում գտնվող Սարաքեբ քաղաքում: Նրանք իրենց մոտ են պահել 11 ուղեւոր տղամարդկանց, որոնցից յոթը հայազգիներ են, եւս երեքը՝ քրիստոնյա արաբներ:Հայտնի է առեւանգված հայերի ինքնությունը` Կարո Փամփալյան, Արսեն Արոյան, Լեւոն Զեյթունյան, հայր եւ որդի Բաշար եւ Ջորջ Ռաբաթներ: Վերջինն արդեն ազատ է արձակվել: