1 րոպեի ընթերցում
ԵՐԵՎԱՆ, 18 ՀՈԿՏԵՄԲԵՐԻ, ԱՐՄԵՆՊՐԵՍ: Հալեպում իրավիճակի մեծ փոփոխություններ տեղի չեն ունեցել: Թեպետ որոշ շրջաններում բախումները շարունակվում են, սակայն հայկական թաղամասերում իրավիճակն ավելի հանգիստ է: Այս մասին «Արմենպրես»-ին տեղեկացրեց Բերիո թեմի ազգային առաջնորդարանի մամուլի քարտուղար Ժիրայր Ռեյիսյանն` ավելացնելով, որ հայկական թաղամասերում լսվում են հեռվում արձակվող կրակոցների ձայները: Այլ թաղամասերում տեղի ունեցող բախումների հետեւանքովհայկական թաղամասերի ուղղությամբ միայնպատահական ռումբեր կարող են ընկնել:Անդրադառնալով Հայաստանից Հալեպ ուղարկված մարդասիրական օգնությանը` Ռեյիսյանը նշեց, որ բաշխումը կարիքավոր սիրիահայերին, ինչպես նաեւ արաբներին, դեռեւս չի սկսվել:
Քեսաբի մեր հայրենակիցները տեղեկացնում են, որ իրավիճակը հայաշատ Քեսաբում եւ Ղամիշլիում համեմատաբար հանգիստ է:
Սիրիական ՍԱՆԱ գործակալությունը տեղեկացնում է, որ հոկտեմբերի 17-ին զինված ուժերը տասնյակ զինյալներ են ոչնչացրել Հալեպի Սախուր եւ Շաար թաղամասերում: Ոչնչացվել են նրանց մեքենաները, առգրավվել են զենքերը:
Սիրիայում ավելի քան 18 ամիս շարունակվող բախումների հետեւանքով զոհվել է 30 հազարից ավելի մարդ, այդ թվում` գրեթե չորս տասնյակ հայեր: