2 րոպեի ընթերցում
ԵՐԵՎԱՆ, 8 ՀՈԿՏԵՄԲԵՐԻ, ԱՐՄԵՆՊՐԵՍ: Բերիո թեմի Ազգային իշխանության, Հալեպի երեքհայհամայնքապետերի համաձայնությամբ եւ Բերիո թեմի առաջնորդ Շահան եպս. Սարգսյանի կարգադրությամբ Հալեպի հայկական ծերանոցը տեղափոխվել է ավելի ապահով վայր:«Արմենպրես»-ի հաղորդմամբ` այս մասին«Ազդակ»-ին տեղեկացրել էՀալեպի ազգային առաջնորդարանի մամլո խոսնակ Ժիրայր Ռեյիսյանը:«Հաշվի առնելով Բուսթան Բաշա թաղամասում տեղի ունեցող բախումները եւ այնտեղ գտնվող ծերանոցի վտանգավոր դիրքը` որոշում է կայացվել այն տեղափոխել»,- նշել է Ռեյիսյանը:
Նա նաեւ տեղեկացրել է, որ երկու օրերի ընթացքում մարդկային կորուստներ չեն արձանագրվել, սակայն ժողովուրդը նախազգուշական միջոցառումների է դիմում վտանգը նվազագույնին հասցնելու նպատակով:
Ինչ վերաբերում է Դամասկոսի իրավիճակին, ապա սիրիական ՍԱՆԱ գործակալությունը տեղեկացնում է, որ Դամասկոսի Խալիդ բն ալ Ուալիդ փողոցում գտնվող ոստիկանական ընդհանուր գերատեսչության շենքի մոտակայքում ականապատ մեքենա է պայթել, որի հետեւանքով մեկ աշխատակից զոհվել է, կան նաեւ վիրավորներ: Պայթյունի հետեւանքով մի քանի մեքենաներ են այրվել:
Սիրիայում ավելի քան 18 ամիս շարունակվող բախումների հետեւանքով զոհվել է 30 հազարից ավելի մարդ, այդ թվում` երեք տասնյակից ավելի սիրիահայեր:
