2 րոպեի ընթերցում
ԵՐԵՎԱՆ, 29 ՍԵՊՏԵՄԲԵՐԻ, ԱՐՄԵՆՊՐԵՍ: Թուրքիայի Բինգյոլի շրջանում զինվորական շարասյան վրա Քուրդիստանի աշխատավորական կուսակցության (PKK) զինյալների հարձակման հետեւանքով 10 զինվորներ կորցնելուց հետո այդ երկրի զինված ուժերի ղեկավարությունը որոշել է PKK-ի բախումների վայրեր զինվորներին այսուհետեւ փոխադրել ամերիկյան 60 տեղանոց Chinook հսկա ուղղաթիռներով: Ինչպես հաղորդում է «Արմենպրես»-ը` վկայակոչելով թուրքական «Զաման» թերթը, ԱՄՆ զինված ուժերից նման 10 ուղղաթիռներ գնելու մասին պայմանագիրն ԱՄՆ Կոնգրեսն արդեն վավերացրել է: Պայմանավորվածության համաձայն` ուղղաթիռները Թուրքիա պետք է մատակարարվեն 2015թ-ին, սակայն, սակարակությունների արդյունքում թուրքական կողմին հաջողվել է հասնել նրան, որ ուղղաթիռները Թուրքիա հասնեն առաջիկա 6 ամիսների ընթացքում: Ամերիկյան Chinook տեսակի փոխադրական 10 ուղղաթիռների համար Թուրքիան ԱՄՆ-ին պետք է վճարի մոտ մեկ միլիարդ դոլար:
Ուղղաթիռը 60 զինվորների հետ միասին կարող է տեղափոխել F-16 մարտական ինքնաթիռ, ավտոմեքենաներ, հրետանային համակարգեր: Նման ուղղաթիռներ օգտագործում են ԱՄՆ-ի, Հունաստանի, Անգլիայի, Իտալիայի, Եգիպտոսի եւ մի շարք այլ երկրների բանակները: CH-47S տիպի Chinook ուղղաթիռներն ամերիկյան բանակի համար առաջին անգամ արտադրվել է 1962 թ-ին: Ուղղաթիռները կարող են թռչել եղանակային ցանկացած պայմանի ժամանակ: Ուղղաթիռներն ԱՄՆ բանակում կշահագործվեն մինչեւ 2040 թ-ը: