3 րոպեի ընթերցում
ԵՐԵՎԱՆ, 28 ՍԵՊՏԵՄԲԵՐԻ, ԱՐՄԵՆՊՐԵՍ: Նախօրեին եւ ամբողջ գիշեր Հալեպում ընթացել են մարտեր ու ռուբեր են պայթել, սակայն արդեն մոտ մեկ ժամ է քաղաքում իրավիճակը հանդարտվել է: Այս մասին «Արմենպրես»-ին տեղեկացրեց Հալեպի Ազգային առաջնորդարանի մամլո խոսնակ Ժիրայր Ռեյիսյանն` ավելացնելով, որ սեպտեմբերի 27-ի երեկոյան Հալեպի տարբեր թաղամասերում, այդ թվում` Սույելմանիայում եւ շրջակա տարածքներում, ռումբեր են պայթել` ահ ու սարսափ տարածելով բնակիչների շրջանում: Մարտերը շարունակվել են ողջ գիշեր եւ մինչեւ առավոտ բանակը ռմբակոծել է ընդդիմադիրների հավաքատեղիների ուղղությամբ:
Ռեյիսյանի խոսքով` պայթյունների հետեւանքով զոհեր եւ վիրավորներ կան, որոնց թիվը դեռեւս ճշտված չէ: «Մինչ այժմ հայկական շտապ օգնության մարմինը փորձում է տարբեր ուղղություններով ճշտել հնարավոր հայ վիրավորների կամ զոհերի վերաբերյալ տեղեկություններ,բարեբախտաբար, մինչ այս պահը որեւէ տեղեկություն չի ստացվել»,- նշել է մամլո խոսնակը:Հայաշատ Նոր գյուղ թաղամասում եւս կրակոցներ են եղել, իսկ Բուսթան Բաշայի մեջ գտնվող հայկական ծերանոցը, որը մի քանի անգամ նյութական վնասներ է կրել, բարեբախտաբար, հերթական բախումների հետեւանքով մարդկային կորուստներ չի կրել:
Ավելի վաղ Սիրիայի ընդդիմությունը հայտարարել էր, որ սեպտեմբերի 27-ին խոշոր հարձակումներ են սկսել Հալեպում` ավելացնելով, որ վճռական պաքար է մղվում նախագահ Բաշար Ասադի զորքերին վռնդելու համար: Տարբեր ընդդիմադիր խմբավորումների անդամներ մատնանշել են, որ արյունալի բախումներ տեղի են ունեցել 14 շրջաններում: YouTube-ում տեղադրված տեսանյութի մեջ ընդդիմադիր ղեկավարներից Կադիր Սալեհը հայտարարել է վճռական պայքարի մեկնարկի մասին: Նրա խոսքով` Ասադի ուժերի դեմ ուղղված հարձակումն այժմ սկսվել է բոլոր ճակատներով:
Այս կապակցությամբ Ռեյիսյանը նշեց, որ կառավարական ուժերն իրենց հերթին հայտարարել են, որ ոք ոքի թույլ չեն տա խանգարել ժողովրդի անդորրը` ավելացնելով, որ ժողովուրդը չպետք է մտահոգվի նման հայտարարությունների համար:
Սիրիայում ավելի քան 18 ամիս շարունակվող բախումների հետեւանքով արդեն զոհվել է 30 հազարից ավելի մարդ, այդ թվում` երկու տասնյակից ավելի սիրիահայեր: