2 րոպեի ընթերցում
ԵՐԵՎԱՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ: Հալեպի հայաշատ, ինչպես նաեւ քրիստոնեական թաղամասերի մոտակայքում բախումները շարունակվում են: Այս մասին «Արմենպրես»-ին տեղեկացրեց Հալեպի Ազգային առաջնորդարանի մամլո խոսնակ Ժիրայր Ռեյիսյանը` ավելացնելով, որ հայաշատ թաղամասերը երբեմն բախումների դաշտ են դառնում:
«Երկու կողմերը փորձում են իրենց հսկողությունը սահմանել Հալեպի թաղամասերում, սակայն, ընդհանուր առմամբ, հայաշատ եւ քրիստոնեական թաղամասերը սիրիական բանակի հսկողության տակ են»,- նշեց մամլո խոսնակը: Նա նաեւ ավելացրեց, որ նյութական մեծ վնասներ են կրել հատկապես խանութները եւ տարբեր շինություններ: Ինչ վերաբերում է Նոր գյուղից ապահով վայրեր տեղափոխված բնակիչներին, ապա վերջիններս դեռեւս չեն վերադարձել իրենց բնակավայրեր:
Ռեյիսյանը նշեց, որ ազգային իշխանությունները համաձայնության են եկել Սիրիայի Կրթության նախարարության հետ հայկական դպրոցների բացումը մեկ շաբաթով հետաձգելու համար` հույս ունենալով, որ իրավիճակն կբարելավվի:
«Հալեպի Սուլեյմանիա լրատվական ցանց» ֆեյսբուքյան էջից տեղեկացանք, որ պայթյուններ են տեղի ունեցել Մայսալուն, Բուսթան Բաշա, Սուլեյման Հալաբի, Սուլեյմանիա, թաղամասերի մոտակայքում:
Ինչ վերաբերում է Դամասկոսում տեղի ունեցող իրադարձություններին, ապա սիրիահայ համայնքի ներակայացուցչից տեղեկացանք, որ մայրաքաղաքում իրավիճակը հանգիստ է, բախումներ են տեղի ունենում ծայրամասերում, մասնավորապես Հաջր Ասուադի շրջանում, որտեղ կենտրոնացել են զինված խմբավորումները:
Սիրիայում ավելի քան 18 ամիս շարունակվող բախումների հետեւանքով զոհվել են 20 հազարից ավելի մարդ, այդ թվում` երկու տասնյակից ավելի սիրիահայեր:
