2 րոպեի ընթերցում
ԵՐԵՎԱՆ, 13 ՍԵՊՏԵՄԲԵՐԻ, ԱՐՄԵՆՊՐԵՍ: Հալեպի հայաշատ Նոր Գյուղ (Միդան) շրջանը վտանգավոր վիճակում է հայտնվել: Այս մասին«Արմենպրես»-ին տեղեկացրեց Հալեպի ազգային առաջորդարանի մամլո քարտուղար Ժիրայր Ռեյիսյանը: Նրա խոսքով` բախումները Միդանում շարունակվում են նաեւ այս պահին: «Բնակիչներից շատերը, այդ թվում` հայեր եւ արաբներ, վախից եւ անապահով վիճակից տեղափոխվում են առավել անվտանգ թաղամասեր: Ավելի ապահով վայրեր տեղափոխվել ցանկացող մարդկանց կամքին ոչ ոք չի բռնանում»,-ասաց նա:
Իսկ ինչ վերաբերում է Միդանից բնակչության տարհանման առնչությամբ կառավարության արած կոչի մասին լուրերին, ապա Ռեիսյանը հերքեց դրանք` նշելով, որ նման հայտարարություն չի եղել:
Մամլո խոսնակը տեղեկացրեց նաեւ, որ սուրբ Գրիգոր Լուսավորիչ եկեղեցու մոտակայքում ռումբ է պայթել, որի հետեւանքով շինությունը նյութական վնասներ է կրել: Մոտակայքում ռումբերի պայթյուններից վնասվել են նաեւ հայկական այլ հատատատություններ եւ շինություններ:
Հալեպահայերի ֆեյսբուքյան էջից«Արմենպրես»-ը տեղեկացավ, որ բախումներ են ընթանում նաեւ Գյուլբենկյան հիվանդանոցի, մզկիթի մոտակայքում:Հալեպահայերը նշում են, որ Նոր գյուղի շրջանն այժմ ավելի ապահով է, քան Թելեֆոն Հաուայե շրջանը, որտեղ այժմ բախումներ են ընթանում:
Սիրիայում ավելի քան 18 ամիս շարունակվող բախումների հետեւանքով զոհվել է 20 հազարից ավելի մարդ, այդ թվում` երկու տասնյակից ավելի սիրիահայեր: