Սիրիայում հայ ընտանիքի սպանության լուրը չի հաստատվում, իսկ Հալեպում վիրավորված Մեսրոպ Չինչինյանը մահացել է

ԵՐԵՎԱՆ,30 ՕԳՈՍՏՈՍԻ, ԱՐՄԵՆՊՐԵՍ: Սիրիայում վեց հոգանոց հայ ընտանիքի սպանության լուրը չի հաստատվում: Այս մասին«Արմենպրես»-ին տեղեկացրեց ՀՀ արտաքին գործերի նախարարության մամլո խոսնակ Տիգրան Բալայանը:

Օգոստոսի 29-ին տեղեկություն էր տարածվել, որ զինված խմբավորումը Դամասկոսի Զամալքա արվարձանում քաղաքացիների է առեւանգել, որոնց թվում` նաեւ կանանց: Առեւանգվածները սպանվել են քաղաքացիների աչքի առջեւ, դիերը` հավաքվել Աշ շեյխ Ասքար մզկիթում: Ոչ պաշտոնական աղբյուրները հայտնել էին, թե մզկիթում հայտնաբերվածների թվում հայերի վեց հոգանոց ընտանիքի անդամներ են:

Հալեպահայերը տեղեկացնում են նաեւ, որՀալեպի Սաբաա Բահրաթ թաղամասում` իր գրասենյակում, շուրջ երկու շաբաթ առաջ ծանր վիրավորված Մեսրոպ Չինչինյանը մահացել է:Թեեւ հիվանդանոց տեղափոխվելուց հետո նա վիրահատվել էր եւ վիճակը կայուն էր, սակայն բժիշկներին չհաջողվեց փրկել նրա կյանքը: Օգոստոսի 30-ին տեղի է ունեցել նրա հուղարկավորությունը:

Սիրիայի զինված ուժերը շարունակում են Դամասկոսի Զամալքա արվարձանում հետապնդել զինված խմբավորումներին: Բախումների արդյունքում զինյալներից շատերը սպանվել եւ վիրավորվել են, առգրավվել է մեծ քանակությամբ զենք, այդ թվում` իսրայելական արտադրության նռնակներ:

Ընդդիմադիրների եւ կառավարական զորքերի միջեւ Սիրիայում սկսված բախումների հետեւանքով զոհվել ենմեկ տասնյակից ավելի հայեր, որոնցից երկուսը` սիրիական բանակի զինծառայողներ: Մեծ թվով սիրիացիներ լքում են երկիրը եւ հայտնվում են այլ երկրներում փախստականի կարգավիճակով: Վերջին շրջանում երկիրը լքում են նաեւ տեղի հայ համայնքի ներկայացուցիչները: Հայաստանում փախստականի կարգավիճակ կամ ապաստան ստանալու մասին Սիրիայիցդիմումները քննվում են արագացված ընթացակարգով` առնվազն տասն օրվա ընթացքում:Մինչ օրս Հայաստան են ժամանել շուրջ 1900 սիրիահայեր:ՀՀ միգրացիոն պետական ծառայությանը մինչ այժմ դիմել է սիրիահայ 47 ընտանիք` 91 անդամներով, որոնցից 20 ընտանիք (46 հոգի) ապահովվել է ժամանակավոր կացարանով: