2 րոպեի ընթերցում
ԵՐԵՎԱՆ, 1 ՕԳՈՍՏՈՍ, ԱՐՄԵՆՊՐԵՍ: Սիրիայի զինված ուժերը շարունակում են հետապնդել ահաբեկչական խմբավորումներին, որոնք շրջապատել են Հալեպի որոշ թաղամասեր, այդ թվում` Սալահ ադ Դինը:Ինչպես հաղորդում է «Արմենպրես»-ը` վկայակոչելով արաբական լրատվամիջոցները, բախումների արդյունքում սպանվել եւ վիրավորվել են մեծ թվով ահաբեկիչներ, որոնք աֆրիկյան եւ արաբական պետությունների քաղաքացիներ են:
Սիրիական պաշտոնական ՍԱՆԱ գործակալությունը տեղեկացնում է, որ սպանվածների թվում է ահաբեկչական խմբավորումների ղեկավարներից Ահմադ Հաջ Կասիմ բն Աբդ ալ Ռահմանը:Տեղեկություններ են ստացվել այն մասին, որ ահաբեկիչները զգալի կորուստներ են կրել նաեւ Կուբթան ալ Ջաբալում:
Սիրիայի ընդդիմության ներկայացուցիչները հայտարարել են, որ ընդդիմությունը նպատակ է դրել մի քանի օրվա ընթացքում վերահսկողություն հաստատել Հալեպի կետրոնում եւ Սիրիայի մեծ քաղաքներում` չնայած Ասադի զինված ուժերի պաշտպանություններին:
Սիրիայի կառավարությունը հուլիսի 31-ին ՄԱԿ-ի Անվտանգության խորհրդից պահանջել է վտարել Սիրիա ներխուժած ահաբեկչական խմբավորումներին, որոնց աջակցում եւ ֆինանսավորում են Քաթարը, Թուրքիան եւ Սաուդյան Արաբիան: ՄԱԿ-ին ուղղված փաստաթղթում նաեւ նշվել է, որ շարունկավող միջամտությունը խախտում է ճգնաժամի կարգավորման համաձայնությունը, որը հաստատվել է հուլիսի 8-ին ՄԱԿ-ի հատուկ բանագնաց Քոֆի Անանի` Դամասկոս կատարած այցելության ժամանակ: