ԵՐԵՎԱՆ, 28 ՀՈՒԼԻՍԻ, ԱՐՄԵՆՊՐԵՍ: Ն.Ս.Օ.Տ.Տ. Արամ Ա Կաթողիկոսը շարունակում է կապ հաստատել Սիրիայի հայության հոգեւոր եւ համայնքային պատասխանատուների հետ: Այս մասին «Արմենպրես»-ին տեղեկացրին Մեծի Տանն Կիլիկիո կաթողիկոսության տեղեկատվական ծառայությունից:
Վեհափառ հայրապետը մեծ ուշադրությամբ է հետեւում նրանց կատարած աշխատանքներին: Ծանոթանալով նաեւ սիրիահայ ընտանիքների առջեւ ծագած տնտեսական դժվարություններին` Վեհափառը գումար է հատկացրել Ազգային Առաջնորդարանին սննդի եւ այլ կարիքների համար:
Արամ Ա Կաթողիկոսն ընդգծել է սիրիահայերին օգնելու անհրաժեշտությունը:
«Միջին Արեւելքի հայկական գաղութների կենսունակության պահպանումն առաջնահերթություն է` ելնելով մեր ազգի ընդհանրական ու գերագույն շահերից: Լիբանանի հայությունը լիբանանյան պատերազմի օրերին, շնորհիվ հավաքական կամքի, հավատի ու միասնականության` կանգուն մնաց: Նույնը պետք է կատարի նաեւ Սիրիայի հայությունը: Այժմ զգացական հայտարարություններ անելու ժամանակը չէ: Պետք է զորավիգ լինել Սիրիայի հայությանը, որպեսզի նրանք կարողանան հաղթահարել դժվարությունները»,- ասել է Վեհափառը:
Արամ Ա-ն հանձնարարել է Կիլիկիո Կաթողիկոսության թեմերին` նյութական աջակցություն ապահովել նաեւ Սիրիայի ազգային վարժարանների համար: