1 րոպեի ընթերցում
ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ: Հայաստանի Հանրապետության սփյուռքի նախարար Հրանուշ Հակոբյանը հուլիսի 27-ին ընդունել է Ռուսաստանի Դաշնության Ամուրի մարզի դումայի անդամ Գենադի Կուզնեցովի գլխավորած պատվիրակությանը: Պատվիրակության կազմում էր նաեւ Ռուսաստանի հայերի միության` Ամուրի մարզի տարածաշրջանային բաժանմունքի ղեկավար Արթուր Ղազարյանը:
Ինչպես «Արմենպրես»-ին տեղեկացրեցին նախարարության տեղեկատվության եւ հեռահաղորդակցության վարչությունից, հանդիպման ընթացքում քննարկվել են Բլագովեշենսկի հայ համայնքի հետ կապված հարցերը եւ հայ համայնքի ներկայացուցիչների միջնորդությամբ ու օժանդակությամբ Հայաստանի էներգետիկայի բնագավառում ներդրումների հնարավորությունները:
Պայմանավորվածություն է ձեռք բերվել վերը նշված հարցերի հետագա մասնագիտական քննարկումը կազմակերպել ՀՀ էներգետիկայի եւ բնական պաշարների նախարարությունում: