3 րոպեի ընթերցում
ԵՐԵՎԱՆ, 21 ՀՈՒՆԻՍԻ, ԱՐՄԵՆՊՐԵՍ: Բանաստեղծ Լյուդվիգ Դուրյանի «Այսքանը իմ կյանքից» հուշապատումի շնորհանդեսը տեղի ունեցավ հունիսի 21-ին` Հայաստանի գրողների միությունում:
«Այս գիրքը կենսագրական է, որտեղ ներկայացվում է բանաստեղծի կյանքը` մանկությունը, բանաստեղծական բարդ եւ լուսավոր ճանապարհը, ստեղծագործական կուտակումները եւ կյանքի վերջին օրերը»,-«Արմենպրես»-ի թղթակցի հետ զրույցում ասաց Լյուդվիգ Դուրյանի այրին` Ջեմա Պետրոսյանը` հավելելով, որ գրքում ներկայացվում են նաեւ Գեղամ Սարյանի, Հովհաննես Շիրազի, Պարույր Սեւակի, Մկրտիչ Սարգսյանի, Վահագն Դավթյանի կենդանի եւ ինքնատիպ դիմանկարները:
Նրա խոսքով` Դուրյանը դեռ շատ ասելիք ուներ, բայց չհասցրեց եւ ամեն ինչ թողեց անավարտ: «Նա ցանկանում էր գրականության մեջ բացահայտել հայ կնոջը եւ այն դարձնել ազգային կերպար»,-նշեց Ջեմա Պետրոսյանը` հավելելով, որ Դուրյանի համար ողջ ստեղծագործական կյանքում առաջնահերթը եղել է հայրենասիրոււթյունը:
«Այսքանը իմ կյանքից» հուշապատումի մեջ բացի կենսագրությունից զետեղված են նաեւ «Թումանյանը ամեն վայրկյան» գրական էսսեն եւ «Նրանք անեցիներ են» ակնարկը:
Հայաստանի գրողների միության նախագահ Լեւոն Անանյանն ավելացրեց, որ Դուրյանը մի բանաստեղծ է, ում հասարակությունը սիրում ու գնահատում է եւ նրա միջոցով կարողացավ ծանոթանալ ճշմարիտ գրականությանը:
«Նա մի մարդ էր, ում ականջին Ավետիք Իսահակյանը շշնջաց, որ հարկավոր է լինել ժողովրդի հետ: Նա գնաց, թողնելով իր ապրած կյանքի պատկերը, քաղաքացու, հայի, բանաստեղծի կերպարը»,-ընդգծեց Լեւոն Անանյանը:
Նա նշեց, որ այս գիրքը մի բանալի է, որը հնարավորություն է տալիս ընթերցողին մուտք գործել Դուրյանի գրական աշխարհ եւ քայլ առ քայլ հետեւել նրա հասունացմանը:
Լյուդվիգ Դուրյանը ծնվել է 1933 թվականի հունիսի 21-ին Ռոստովի մարզի Մյասնիկյանի շրջանի Չալթր հայաբնակ գյուղում: 1935 թվականին ընտանյոք տեղափոխվել է Հայաստան: Ավարտել է Մոսկվայի Գորկու անվան համաշխարհային գրականության ինստիտուտի բարձրագույն դասընթացները:Երկար տարիներ պատասխանատու պաշտոններ է վարել Հայաստանի գրահրատարակչության ասպարեզում եւ բեղմնավոր, շնորհակալ աշխատանք կատարել մեր հին եւ նոր գրականության արժեքավոր գրքերի հրատարակման ասպարեզում: Նա արժանացել է մի շարք մրցանակների, այդ թվում` Հովհ. Թումանյանի անվան գրական մրցանակի: Իր սկզբունքայնության, մարդկային բարձր արժանիքների շնորհիվ Լյուդվիգ Դուրյանը մեծ հեղինակություն էր վայելում գրական հասարակայնության շրջանում, սիրված եւ ճանաչված անուն էր թե՛ գրաքննադատների եւ թե՛ ընթերցողների կողմից:
