2 րոպեի ընթերցում
ԵՐԵՎԱՆ, 17 ՀՈՒՆԻՍԻ, ԱՐՄԵՆՊՐԵՍ: Ֆուտբոլի Եվրոպայի առաջնության վերջին տուրի A խմբում միմյանց հետ ուժերը չափեցին Հունաստանի եւ Ռուսաստանի ընտրանիները:
«Արմենպրես»-ի փոխանցմամբ, հանդիպման հենց մեկնարկում հույները ցույց տվեցին, որ վճռական են տրամադրված, քանի որ հույներին այս խաղում միայն հաղթանակ էր հարկավոր:
Չնայած ռուսների համար ոչ-ոքին հավասարազոր էր հաղթանակի, այնուամենայնիվ, նրանք խաղն սկսեցին սուր հակագրոհներվ, որն էլ լուրջ անհանգստություն էր պատճառում հույների դարպասապահ Սիֆակիսին:Երկու թիմերն էլ ամեն կերպ ձգտում էին առաջինը բացել խաղի հաշիվը: Իրար հաջորդող հակագրոհերն ավելի տեմպային եւ բաց ֆուտբոլի էին վերածել հանդիպումը:
Թե հույները եւ թե ռուսներն ամեն կերպ փորձում էին գտնել մրցակցի թույլ կողմերը: Եթե հանդիպման միջնամասում առավելությունը հույների կողմն էր, ապա խաղի միջնամասում հանդիպումն ընթանում էր հավասար պայքարում: Ավելի վտանգավոր էին ստացվում ռուսների գրոհները:
Սակայն հանդիպման ավելացված րոպեի վերջին, օգտվելով Ռուսաստանի պաշտպանության թույլ տված սխալից, հույներից գոլի հեղինակ դարձավ Կարագունիսը:
Երկրորդ խաղակեսի մեկնարկում ռուսները նետվեցին հետ բերելու կորցրածը, բայց վճռական քայլերը չէին ստացվում, որովհետև հույների պաշտպանությունը շարունակում էր անխոցելի մնալ:Հունաստանի ընտրանին գեղեցիկ կերպով կարողանում էր նաև պաշտպանությունից զսպանակի նման անցնել հակագրոհի` լարվածության մեջ պահելով ռուսներին:
Երկու թիմերի ֆուտբոլիստների մոտ հետզհետե սկսեցին նյարդերը տեղի տալ: Ռուսները չէին կարողանում ուշքի գալ առաջին կեսում սեփական դարպասն ընդունած գնդակից ու դիմում էին կոպիտ խաղի:
Ռուսներին ոչ միայն չհաջողվեց վերագտնել իրենց խաղը, այլեւ հանդիպման վերջնամասում հիմնականում պաշտպանվում էին` խուսփելով երկրորդ գնդակն ընդունելուց:
Երկու թիմերի պայքարում ի վերջո «փլեյ օֆի» ուղեգիր նվաճեց Հունաստանի ընտրանին` խմբում զբաղեցնելով երկրորդ տեղը:
Հունաստան Ռուսաստան
5 Անկյուն 8
2 Դեղին 4
0 Կարմիր 0