1 րոպեի ընթերցում
ԵՐԵՎԱՆ, 7 ՄԱՐՏԻ, ԱՐՄԵՆՊՐԵՍ: Պաշտոնական այցով Ադրբեջանում գտնվող Վրաստանի նախագահ Միխայել Սաակաշվիլին մարտի 7-ին Միլի Մեջլիսում իր ելույթի ժամանակ հայտարարել է, որ Վրաստանն ու Ադրբեջանը համատեղ հայտ են ներկայացնելու Եվրոպայի 2020 թվականի ֆուտբոլի առաջնությունն իրենց մոտ անցկացնելու համար:
Ինչպես տեղեկացնում է «Արմենպրես»-ը` վկայակոչելով ադրբեջանական լրատվականները` Վրաստանի նախագահը հավելել է, որ ստեղծվելու է համապատասխան հանձնաժողով, որը կարգավորելու է աշխատանքներն այդ ուղղությամբ:
Նշենք, որ 2020 թվականի Եվրոպայի առաջնությունը լինելու է 16-րդը և վերջին անգամ անցկացվելու է 24 հավաքականների մասնակցությամբ: 2024 թվականից Եվրոպայի առաջնությունում մասնակցելու հնարավորություն կստանան արդեն 32 հավաքականներ: