«Նոր ալիք» երաժշտական մրցույթի հայաստանյան մասնակիցը կորոշվի Մոսկվայում

ԵՐԵՎԱՆ, 5 ՄԱՐՏԻ, ԱՐՄԵՆՊՐԵՍ:Մեկնարկել է «Նոր ալիք» միջազգային երաժշտական փառատոնի հայաստանյան նախընտրական փուլը: Մասնակցության հայտերը պետք է ներկայացնեն «Արմենիա» հեռուստաընկերություն` մարտի 1-ից 24-ն ընկած ժամանակահատվածում: Մասնակցել կարող են բոլոր այն կատարողները, ովքեր իրենց երիտասարդ ու տաղանդավոր են համարում: Կիսաեզրափակիչ փուլն անցած 3-7 մասնակից կմեկնի Մոսկվա` մասնակցելու նախընտրական եզրափակիչ փուլին, որտեղ էլ կորոշվի «Նոր ալիքում» Հայաստանը ներկայացնող այս տարվա մասնակիցը:

Մրցույթի հայաստանյան փուլի պատասխանատու Մհեր Բաղդասարյանը «Արմենպրես»-ին տեղեկացրեց, որ ապրիլի սկզբին Երևանում կկայանա հայաստանյան նախընտրական փուլի եզրափակիչ համերգը, որին ներկա կգտնվեն մրցույթի կազմում ընդգրկված ռուսական շոու-բիզնեսի կատարողներ և հաղորդավարներ: Հայաստան կժամանի նաև մրցույթի պաշտոնական ժյուրին, որին կմիանան նաև ոլորտի հայաստանյան մասնագետներ և մրցույթի երաժշտական պրոդյուսերը: Փոփոխություններ են սպասվում մրցույթի անցկացման տեղի հետ կապված. հնաավոր է` այս տարի այն չանցկացվի Յուրմալա քաղաքում: