Բուլղարիայում ՀՀ դեսպանն ընդունել է երիտասարդ հայ կինոռեժիսորի մրցանակը «Golden FEMI» փառատոնում

Բուլղարիայի Հանրապետությունում ՀՀ դեսպան Ծովինար Համբարձումյանը հունիսի 6-ին մասնակցել է Սոֆիայում կայացած հինգերորդ «Golden FEMI» միջազգային կինոփառատոնի Գալա մրցանակաբաշխությանը։

Արարողության ընթացքում դեսպանն ընդունել է երիտասարդ հայ կինոռեժիսոր Միլենա Հովհաննիսյանի մրցանակը, որը նրան շնորհվել էր փառատոնի միջազգային ժյուրիի կողմից «Հոգևոր ուժ» վավերագրական ֆիլմի համար։

«Golden FEMI» կինոփառատոնը միջազգային մշակութային միջոցառում է, որը նվիրված է շրջակա միջավայրի վերաբերյալ իրազեկվածության, սոցիալական ներգրավվածության, կինոյում կանանց նվաճումների, ինչպես նաև հասարակության խոցելի խմբերին աջակցության, մարդկային արժանապատվության և համերաշխության արժեքների խթանմանը։

Վավերագրական «Հոգևոր ուժ» ֆիլմը մի մարդու ոգեշնչող պատմություն է. ողբերգական վթարի ժամանակ երկու ձեռքերը կորցնելուց հետո ֆիլմի հերոսը բախվել է հսկայական մարտահրավերների, սակայն հաղթահարել է դրանք դիմադրողականության, ստեղծագործ մտքի և նպատակասլացության միջոցով՝ որպես գյուտարար ու նորարար շարունակելով մեծ ներդրում ունենալ հասարակության մեջ։

Ֆիլմն այս բարձր ճանաչմանն Է արժանացել իր հզոր մարդկային ուղերձի և գեղարվեստական ​​​​արժեքի համար։

Հայաստանից բացի, մրցանակների են արժանացել նաև Արգենտինայի, Ինդոնեզիայի, Լեհաստանի, Լիբանանի, Կիպրոսի, Մոնղոլիայի, Մարոկոյի ներկայացրած ֆիլմերը։

Դեսպան Համբարձումյանը շնորհակալություն է հայտնել փառատոնի կազմակերպիչներին, մասնավորապես փառատոնի նախագահ Էֆեմիա Ֆարդին, միջմշակութային երկխոսության այս կարևոր հարթակը ստեղծելու համար և ընդգծել կինոյի կարևոր դերը համընդհանուր արժեքների, փոխըմբռնման և մարդկային արժանապատվության նկատմամբ հարգանքի խթանման գործում։

«Արմենպրես»-ի հաղորդմամբ՝ դեսպանը նաև ընդգծել է Հայաստանի և Բուլղարիայի միջև երկկողմ համագործակցության կարևորությունը՝ նշելով, որ գեղարվեստական ​​և մշակութային փոխանակումները շարունակում են ամրապնդել երկու երկրների միջև երկարատև բարեկամությունը։

Բուլղարիայում Հայաստանի Հանրապետության դեսպանությունը ի սրտե շնորհավորում է Միլենա Հովհաննիսյանին այս պատվավոր մրցանակի կապակցությամբ և մաղթում նրան շարունակական հաջողություններ իր ապագա ստեղծագործական ջանքերում։