1 րոպեի ընթերցում
ԵՐԵՎԱՆ, 1 ՄԱՐՏԻ, ԱՐՄԵՆՊՐԵՍ: Միջազգային ընկերական հանդիպումներից հերթականում միմյանց հետ ուժերը չափել են Իսրայելի եւ Ուկրաինայի ազգային ընտրանիները:
Ինչպես փոխանցում է «Արմենպրես»-ը, վկայակոչելով ՖԻՖԱ-ի պաշտոնական կայքը, փետրվարի 29-ին կայացած խաղումՕլեգ Բլոխինի սաներին հաջողվել է 3 գնդակ ուղարկել Իսրայելի դարպասը` սեփականն ընդունելով 2-ը:
17-րդ րոպեին նշանակված 11 մետրանոց անվրեպ է իրացրել Գուսեւը` առաջ մղելով ուկրաինացիներին: Առաջին կեսի ավարտին Կոնոդյանկայի գոլը կրկնապատկել է խաղի հաշիվը (45 րոպե):
Երկրորդ խաղակեսում կրկին նշանակվել է 11 մետրանոց հարված` այս անգամ արդեն ուկրաինացիների դարպասին: Այն անվրեպ է իրացրել Հեմենը` կրճատելով խաղի հաշիվը:
«Դեղնակապտավուներին» հաջողվել է եւս մեկ անգամ գրավել մրցակցի դարպասը: 61-րդ րոպեին գոլի հեղինակ է դարձել Յարմոլնիկը: Երկու րոպե անց իսրայելցիները կարողացել են գրավել Դիկանի դարպասը, սակայն չի հաջողվել խուսափել պարտությունից: