Թուրք գնդապետը հորդորել է իշխանություններին միջոցներ ձեռնարկել Քրդական աշխատավորական կուսակցության դեմ

ԵՐԵՎԱՆ, 25 ՓԵՏՐՎԱՐԻ, ԱՐՄԵՆՊՐԵՍ: Թուրք մեկնաբան և պաշտոնաթող գնդապետ Էրդալ Սարըզեյբեքը քննադատել է թուրքական կառավարությանը Քրդական աշխատավորական կուսակցության (ՔԱԿ) դեմ ոչինչ չձեռնարկելու մեջ: Այս մասին հաղորդում է «Արմենպրես»-ը` վկայակոչելով թուրքական DHA գործակալությունը:

Էրդալը Սալիհքենթի քաղաքապետարանի հանդիպումների սրահում ելույթի ժամանակ նշել է, որ Թուրքիայի ունեցած աշխարհագրական դիրքի շնորհիվ այն մշտապես գտնվում է ուշադրության կենտրոնում: Նախկին գնդապետը նշել է, որ անհրաժեշտ է կարողանալ տեր կանգնել նման աշխարհագրությանը, հակառակ դեպքում կկատարվի նույնը, ինչ տեղի է ունեցել Օսմանյան կայսրության հետ:

«Օսմանյան կայսրությունը թուլանալուն պես պատմության մեջ աննախադեպ կերպով հարձակումների թիրախ դարձավ: 3 Անատոլիայի չափ տարածք կորցրինք»,- նշել է նա:

Խոսելով Քրդական աշխատավորական կուսակցության մասին` Էրդալը հայտնել է, որ ներկայումս Շվեյցարիայի բանկերում այն շուրջ 1 միլիոն դոլար ունի: Նա քննադատել է թուրքական կառավարությանը լուռ մնալու և ոչինչ չձեռնարկելու մեջ: Նախկին գնդապետը կոչ է արել թուրքական կառավարությանն ու ասել. «Եթե իմանաք այս փողի գոյության մասին և անհրաժեշտ ոչինչ չանեք, ապա կհամարվեք մեր զոհերի մարդասպանները»: Նա նաև զգուշացրել է, որ քրդական կուսակցությունը օրեցօր ավելի է ուժեղանում, ինչը մեծացնում է Արևելքում «ՔԱԿ ինքնավար իշխանության» ստեղծման հավանակաությունը: