Գարեգին Բ-ն ընդունել է Եկեղեցիների համաշխարհային խորհրդի հանձնախմբին

ԷՋՄԻԱԾԻՆ, 21 ՀՈՒՆԻՍԻ, ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց Կաթողիկոսը հունիսի 19-ին ընդունել է Եկեղեցիների համաշխարհային խորհրդի 13-րդ համաժողովի ծիսական հարցերով նախապատրաստող հանձնախմբի անդամներին, ովքեր հունիս 18-21-ն իրենց հերթական ժողովն են անցկացնում Մայր Աթոռ Ս. Էջմիածնում: Ինչպես «Արմենպրես»-ին հայտնեցին Մայր Աթոռի տեղեկատվական համակարգից, Նորին Սրբությունը ողջունել է ժողովի մասնակիցներին եւ իր օրհնությունն ու բարեմաղթանքները բերել նրանց: Վեհափառ Հայրապետը գոհունակությամբ նշել է, որ նման այցելությունները հնարավորություն են ընձեռում ծանոթանալու ոչ միայն Հայաստանյայց Առաքելական Ս. եկեղեցուն, երկրին ու հայ ժողովրդի կյանքին, այլեւ իրենց ներկայությամբ ու ջանքերով հարստացնում են մեր մշակույթը:

Հանդիպման ընթացքում անդրադարձ է կատարվել Հայ եկեղեցու ներկայիս գործունեությանը, ինչպես նաեւ Քույր եկեղեցիների հետ ջերմ փոխհարաբերություններին: Իրենց հերթին հանձնախմբի անդամները շնորհակալություն են հայտնել Մայր Աթոռ Սուրբ Էջմիածնում հյուրընկալվելու հնարավորության համար, որից հետո Ամենայն Հայոց Կաթողիկոսը պատասխանել է ԵՀԽ ներկայացուցիչներին հետաքրքրող հարցերին:

Հանդիպումից հետո հյուրերը Մայր Տաճարում մասնակցել են Ս. Պատարագի արարողությանը: