Գարեգին Բ կաթողիկոսը հեռախոսազրույց է ունեցել Ալլահշյուքուր Փաշա-զադեի հետ

ԷՋՄԻԱԾԻՆ, 4 ՓԵՏՐՎԱՐԻ, ԱՐՄԵՆՊՐԵՍ: Ի պատասխան Կովկասի մուսուլմանների կրոնապետի հունվարի 30-ի հեռախոսազանգի, փետրվարի 4-ին Ն.Ս.Օ.Տ.Տ. Գարեգին Բ Ամենայն հայոց կաթողիկոսը տեղեկացրել է Ալլահշյուքուր Փաշա-զադեին ԼՂՀ նախագահ Արկադի Ղուկասյանի հետ ունեցած իր հեռախոսազրույցի մասին: Վերջինիս ընթացքում ԼՂՀ նախագահը պատրաստակամություն է հայտնել ազատ արձակել հունվարի 8-ին Լեռնային Ղարաբաղի եւ Ադրբեջանի զինված ուժերի շփման գծում վիրավորված եւ գերի ընկած ադրբեջանցի զինվոր Էլմեդդին Աբիեւին: Ըստ Մայր Աթոռի մամլո դիվանի, Նորին Սրբությունը հաղորդել է, որ Աբիեւը գտնվում է բժշկական խնամքի ներքո, եւ նրա արձակման առնչությամբ հարկ է, որ Ադրբեջանի եւ ԼՂՀ ռազմագերիների, պատանդների եւ անհետ կորածների հարցերով պետական հանձնաժողովները ճշտեն ռազմագերու վերադարձման մանրամասները: