1 րոպեի ընթերցում
ԵՐԵՎԱՆ, 29 ՕԳՈՍՏՈՍԻ, ԱՐՄԵՆՊՐԵՍ: Ինչպես հայտնում է Անթիլիասի մամլո դիվանը, Ժնեւում՝ Եկեղեցիների համաշխարհային խորհրդի կենտրոնական վարչության տարեկան ժողովի առաջին նիստում ընդարձակ զեկույցով հանդես է եկել Մեծի Տանն Կիլիկիո Արամ Ա կաթողիկոսը: Վեհափառ հայրապետը իր ելույթում կոչ է ուղղել աշխարհի եկեղեցիներին՝ դուրս գալ անցյալից ժառանգած աստվածաբանական, դավանաբանական ու եկեղեցաբանական կաղապարված մտածողություններից եւ եկեղեցին դիտել ներկա աշխարհի հրամայականների, կարիքների ու մարտահրավերներ համատեքստում: Եկեղեցու էությանն եւ առաքելությանն առնչված Վեհափառի նոր մոտեցումները եւ համաշխարհայնացումի դիմաց եկեղեցու դերակատարության վերաբերյալ առաջ քաշած նրա տեսակետները արժանացել են ԵՀԽ կենտրոնական վարչության, ինչպես նաեւ միջազգային եւ միջեկեղեցական շրջանակների բարձր գնահատականին: