Գարեգին Բ Ամենայն հայոց կաթողիկոսը նամակ է հղել Իսրայելի վարչապետ Արիել Շարոնին

ԷՋՄԻԱԾԻՆ, 31 ՀՈՒԼԻՍԻ. ԱՐՄԵՆՊՐԵՍ: Գարեգին Բ Ծայրագույն պատրիարք եւ Ամենայն հայոց կաթողիկոսն այսօր ընդունել է վանական խորհրդի անդամներին, ովքեր Նորին սրբության բացակայության ժամանակ վարել են Մայր Աթոռ Սուրբ Էջմիածնի ընթացիկ գործերը, եւ լսել է նրանց զեկույցը: Ինչպես հայտնեցին Մայր Աթոռի մամլո դիվանից, վերջում Նորին Սրբությունն իր գնահատանքն է հայտնել խորհրդի անդամներին տարված աշխատանքների համար եւ տեղեկություններ հաղորդել Երուսաղեմի Հայոց Պատրիարքության «Պարոն Տերե կալվածքի շուրջ ծավալված զարգացումների վերաբերյալ՝ ի մասնավորի հայտնելով, որ Պատրիարքարանը հայց է ներկայացրել Իսրայելի դատական բարձրագույն ատյան: Վեհափառ Հայրապետը նաեւ խորհրդի անդամներին հայտնել է, որ հատուկ նամակ է հղել Իսրայելի վարչապետ Արիել Շարոնին, կոչ ուղղելով Իսրայելի կառավարությանը՝ ընդառաջ Պատրիարքարանի հայցին ընդունելի լուծում գտնել միջազգային հնչեղություն ստացած «Պարոն տերե կալվածքի շուրջ ծագած խնդրին, չխաթարելով 400 տարուց ի վեր Հայոց Պատրիարքարանին պատկանող կալվածքի հոգեւոր-մշակութային արժեքը: Նորին Սրբությունը մշտապես կապի մեջ է Ամենապատիվ Պատրիարք Տ. Թորգոմ արք. Մանուկյանի հետ:-0-20.45