2 րոպեի ընթերցում
ԷՋՄԻԱԾԻՆ, 7 ՀՈՒՆԻՍԻ. ԱՐՄԵՆՊՐԵՍ: Հունիսի 7-ին Ն.Ս.Օ.Տ.Տ. Գարեգին Բ Ամենայն Հայոց կաթողիկոսն ընդունեց Հայաստանում Գերմանիայի Դաշնային Հանրապետության արտակարգ եւ լիազոր դեսպան Հանս-Վուլý Բարթելսին: Ինչպես հայտնեցին Մայր Աթոռի մամլո դիվանից, Նորին Սրբությունը ողջունել է դեսպանի անդրանիկ այցը Մայր Աթոռ Սուրբ Էջմիածին, նշելով, որ Սբ Էջմիածինը համագործակցում ու ջերմ հարաբերությունների մեջ է Հայաստանում դիվանագիտական առաքելությունների եւ մասնավորապես Գերմանիայի դեսպանատան հետ: Վեհափառ Հայրապետը, նշել է, որ առանձնակի ջերմությամբ է վերհիշում Գերմանիայում իր ուսման եւ հոգեւոր սպասավորության չորս տարիները եւ առանձնակի երախտագիտություն է տածում հանդեպ գերմանացի ժողովուրդն ու պետությունը՝ Հայ եկեղեցու նկատմամբ ունեցած բարի ու մարդասեր վերաբերմունքի համար: Ինչպես տեղեկացրել է Նորին Սրբությունը, այսօր էլ Սբ Էջմիածնի եւ Գերմանիայի կրոնական կազմակերպությունների միջեւ առկա են սերտ կապեր, որոնք ընդգրկում են ինչպես միջեկեղեցական, այնպես էլ բարեսիրական ու կրթական ոլորտներ: Շնորհակալություն հայտնելով ընդունելության համար, պրն Բարթելսը հավաստել է, որ իր առաքելության ընթացքում ամեն ինչ կանի երկու երկրների եւ եկեղեցիների միջեւ ստեղծված ջերմ հարաբերությունների զարգացման համար: