1 րոպեի ընթերցում
ԵՐԵՎԱՆ, 8 ՆՈՅԵՄԲԵՐԻ. ԱՐՄԵՆՊՐԵՍ: Ն.Ս.Օ.Տ.Տ. Գարեգին Բ Ամենայն Հայոց կաթողիկոսի օրհնությունն ստանալու նպատակով այսօր Մայր Աթոռ Սբ. Էջմիածին այցելեցին Հայաստանի Ժողովրդավարական ազատական միություն նորաստեղծ կուսակցության վարչության անդամները՝ կուսակցության նախագահ Սեյրան Ավագյանի գլխավորությամբ: Ըստ Մայր Աթոռի մամլո դիվանի տեղեկատվության, Հայոց հայրապետը նորաստեղծ կուսակցության անդամների այցը հայոց հոգեւոր կենտրոն նկատել է իբրեւ հայրենիքի եւ ժողովրդի գերագույն շահերի գիտակցության արտահայտություն: Նորին սրբությունը, մտահոգիչ համարելով երկրում կուսակցությունների առատությունը, հույս է հայտնել, որ նորաստեղծ կուսակցության համար մշտապես գերակա կլինեն ազգային շահն ու երկրի բարօրությունը: Այս մաղթանքով էլ Վեհափառ հայրապետն իր օրհնություն է տվել ՀԺԱՄ-ի անդամներին: