3 րոպեի ընթերցում
Հայաստանը ինը պետության հետ ունի գաղտնի տեղեկությունների փոխադարձ պաշտպանության համաձայնագրեր, իսկ մի շարք այլ պետությունների հետ նման փաստաթղթերի կնքման աշխատանքները շարունակվում են։ «Արմենպրես»-ի հաղորդմամբ՝ այս մասին ասել է ՀՀ ազգային անվտանգության ծառայության տնօրենի տեղակալ Եսայի Մկրտչյանը՝ պատասխանելով «Քաղաքացիական պայմանագիր» խմբակցության պատգամավոր Էդուարդ Աղաջանյանի հարցերին՝ Հայաստանի և Ղազախստանի կառավարությունների միջև գաղտնի տեղեկությունների փոխանցման, օգտագործման, պահպանության և պաշտպանության մասին համաձայնագրի վավերացման նախագծի քննարկման ընթացքում։
Աղաջանյանը հետաքրքրվել է, թե ինչ սկզբունքով են ընտրվում նման համաձայնագրեր կնքող պետությունները, և արդյոք Ղազախստանի հետ համագործակցությունը պայմանավորված է ԵԱՏՄ-ին կամ ԱՊՀ-ին անդամակցությամբ։
«Հայաստանի Հանրապետությունը մասնավորապես ինը պետության հետ ունի արդեն գաղտնի տեղեկատվության փոխադարձ պաշտպանության, պահպանության մասին համաձայնագիր։ Մի շարք պետությունների հետ էլ հիմա գործընթաց է իրականացվում, և պատրաստվում ենք դա անել»,- ասել է Մկրտչյանը։
Նա պարզաբանել է, որ Ղազախստանի հետ տեղեկությունների փոխանակումն իրականացվելու է բացառապես երկկողմ ձևաչափով։ Այլ կառույցներում Հայաստանի անդամակցությունը, նրա խոսքով, չի խանգարում այդ համագործակցությանը։
Անդրադառնալով համաձայնագրերի կնքման նախաձեռնությանը՝ ԱԱԾ տնօրենի տեղակալը նշել է, որ այն կարող է լինել երկուստեք՝ հարաբերությունների զարգացման և առաջացող անհրաժեշտության հիման վրա։
«Սա գործընթաց է, որը երկու պետություններն ըստ անհրաժեշտության իրականացնում են։ Հիմա Ղազախստանի հետ հարաբերությունները զարգանում են, և անհրաժեշտություն է առաջանում գաղտնի տեղեկատվության փոխանակման, ու մենք գնում ենք այս ճանապարհով»,- նշել է նա։
Աղաջանյանը բարձրացրել է նաև ստացված տեղեկությունները երրորդ կողմին փոխանցելը կանխելու և հնարավոր խախտումները բացահայտելու մեխանիզմների հարցը։
Պատասխանելով՝ Մկրտչյանը վկայակոչել է համաձայնագրով նախատեսված դրույթները։
«Համաձայնագրում հստակ ամրագրված են այդ դրույթները, և այստեղ մենք գրեթե բացառում ենք փոխանցումը երրորդ կողմին, որովհետև վստահ ենք, որ դրա մասին վաղ թե ուշ կիմանանք։ Եվ կան համաձայնագրում ամրագրված դրույթներ, որոնք հնարավորություն կտան դա բացահայտել»,- ասել է ԱԱԾ տնօրենի տեղակալը։