1 րոպեի ընթերցում
ՀՀ ԱՆ «Արմավիր» քրեակատարողական հիմնարկում հոկտեմբերի 7-ին և 9-ին հայտնաբերվել ու առգրավվել են երկու անօդաչու թռչող սարք, վեց բջջային հեռախոս, երկու Wi-Fi սարք և մեկ լիցքավորման սարք։
Ինչպես տեղեկացնում է «Արմենպրես»-ը՝ վկայակոչելով ՀՀ ԱՆ քրեակատարողական ծառայության հաղորդագրությունը, հոկտեմբերի 7-ին՝ ժամը 22։20-ի սահմաններում, հիմնարկի պահպանության ապահովման բաժնի ծառայողները նկատել են դրոն, որից հետո անմիջապես իրականացրել տարածքի զննություն։
«Արդյունքում՝ տարածքից հայտնաբերվել է անօդաչու թռչող սարք, իսկ տեղամասի տանիքից՝ կպչուն ժապավենով իրար ամրացված երկու բջջային հեռախոս»,- նշված է հաղորդագրությունում։
Դրոնով արգելված իրերի փոխանցման ևս մեկ դեպք նույն հիմնարկում գրանցվել է հոկտեմբերի 9-ին՝ ժամը 06։35-ի սահմաններում։ Անօդաչու թռչող սարքը նկատել են դիտաշտարակներից մեկում ծառայություն իրականացնող պահպանության ապահովման և արգելագոտում շրջայց կատարող անվտանգության ապահովման բաժինների ծառայողները։
Տեղազննության արդյունքում հայտնաբերվել է դրոնը, որին ամրացված են եղել չորս բջջային հեռախոս, երկու Wi-Fi սարք և մեկ լիցքավորման սարք։
Ըստ քրեակատարողական ծառայության՝ դեպքերի առթիվ ձեռնարկվել են համապատասխան միջոցներ։