Ռուսական լրատվամիջոցը հայտնում է Թուրքմենստանում Փաշինյանի, Պուտինի ու Ալիևի հանդիպման մասին
1 րոպեի ընթերցում
Ռուսական «Կոմերսանտ»-ը հայտնում է, որ Հայաստանի վարչապետ Նիկոլ Փաշինյանը, Ռուսաստանի նախագահ Վլադիմիր Պուտինը և Ադրբեջանի նախագահ Իլհամ Ալիևը Թուրքմենստանում կայացած Կասպիական գագաթնաժողովից հետո փակ հանդիպում են ունեցել։
Ինչպես հաղորդում է «Արմենպրես»-ը, այս մասին տեղեկացնում է «Կոմերսանտ»-ի հատուկ թղթակից Անդրեյ Կոլեսնիկովը։
«Կոմերսանտ»-ը գրում է, որ հանդիպման մասին նախապես չէր հայտարարվել։
«15 րոպե տևած հանդիպումը կազմակերպել էր Ռուսաստանի նախագահի օգնական Յուրի Ուշակովը։ ԱՊՀ ընդլայնված գագաթնաժողովի փակ հատվածում նա այդ հարցը առանձին քննարկել է Նիկոլ Փաշինյանի և Իլհամ Ալիևի հետ։ Հայաստանի վարչապետը չի մասնակցել Կասպիական գագաթնաժողովին, բայց սպասել է դրա ավարտին՝ Վլադիմիր Պուտինի և Իլհամ Ալիևի հետ հանդիպելու համար»,-տեղեկացնում է թղթակիցը՝ հավելելով, որ Վլադիմիր Պուտինի՝ Թուրքմենստան կատարած այցից առաջ Յուրի Ուշակովը հայտարարել էր, որ Վլադիմիր Պուտինի և Նիկոլ Փաշինյանի միջև հանդիպում նախատեսված չէ։ Սակայն Ռուսաստանի նախագահի օգնականը չէր բացառել նրանց շփումը միջոցառման ընթացքում։