2 րոպեի ընթերցում
Ազգային ժողովը հոկտեմբերի 6-ի նիստում «Քաղաքացիական պայմանագիր» խմբակցության պատգամավորների 62 կողմ ձայնով ընդունեց Հայ առաքելական եկեղեցուն առնչվող խնդիրներն ուսումնասիրող քննիչ հանձնաժողովի անդամների թիվը սահմանելու մասին որոշումը։ Հանձնաժողովը կունենա 11 անդամ։ «Արմենպրես»-ի հաղորդմամբ՝ դեմ և ձեռնպահ քվեներ չեն եղել։ «Հայաստան» և «Ուժեղ Հայաստան» խմբակցությունների պատգամավորները քվեարկությանը չեն մասնակցել։
Որոշման նախագիծը ներկայացրել է «Քաղաքացիական պայմանագիր» խմբակցության պատգամավոր Արման Եղոյանը։ Հանձնաժողովի ստեղծման պահանջում նա նշված է որպես հանձնաժողովի նախագահ, իսկ դրա լիազորությունների ժամկետը սահմանված է մինչև վեց ամիս։
Ուսումնասիրության շրջանակում ընդգրկված են եկեղեցում բարեվարքության, ֆինանսական տեղեկատվության թափանցիկության և հաշվետվողականության, եկեղեցական ներկայացուցչական ժողովների պատշաճ գումարման, եկեղեցուն պատկանող գույքի օգտագործման, ինչպես նաև եկեղեցու և պետական իշխանության տարանջատմանն առնչվող հարցեր։
Հանձնաժողովի ստեղծման պահանջում նախատեսված է նաև հոգևորականներին ու այլ անձանց նիստերին հրավիրելու, նրանցից գրավոր և բանավոր դիրքորոշումներ ու պարզաբանումներ ստանալու հնարավորություն։
Քննիչ հանձնաժողովն իրավունքի ուժով ստեղծվել էր հոկտեմբերի 2-ին՝ պատգամավորների ընդհանուր թվի առնվազն մեկ քառորդի պահանջով։