2 րոպեի ընթերցում
Լեհաստանում ամերիկյան ռազմակայանի տեղակայումն առանցքային նշանակություն ունի Վարշավայի համար. շարունակվում են դրա շուրջ քննարկումներն ամերիկյան կողմի հետ. ռազմակայանի համար արդեն ընտրվել են վայրերը: «Արմենպրես»-ի փոխանցմամբ՝ այդ մասին լեհական RMF FM ռադիոկայանին հայտնել է Լեհաստանի պաշտպանության փոխնախարար Ցեզարի Տոմչիկը։
«Լեհաստանի տեսանկյունից ամերիկյան ռազմակայանի հարցը հանգուցային է։ Դրա տեղակայման վայրը նախապես ընտրված է։ Մենք ուշադրության ենք առնում երկու վոյեվոդություն՝ Ստորին Սիլեզիան և Մեծ Լեհաստանը, այսինքն՝ Վրոցլավի կամ Պոզնանի մերձակայքը (Լեհաստանի հարավ-արևմուտքը և արևմուտքը)», - ասել է նա։
Պատասխանելով ամերիկյան մշտական ռազմակայան ստեղծելու հնարավորության վերաբերյալ հարցին՝ նա ընդգծել է, որ դրա համար նախևառաջ անհրաժեշտ է Լեհաստանի վարչապետ Դոնալդ Տուսկի համաձայնությունը։ Տոմչիկի խոսքով՝ այդ մասին իրեն հայտնել են նաև Սպիտակ տանը, որտեղ նա վերջերս խորհրդակցություններ է անցկացրել ԱՄՆ նախագահ Դոնալդ Թրամփի խորհրդականների հետ։
Այս տարի ավելի վաղ Լեհաստանը հանդես է եկել երկրում ամերիկյան մշտական ռազմակայան ստեղծելու պաշտոնական առաջարկությամբ։
ԱՄՆ նախագահ Դոնալդ Թրամփն իր հերթին հայտարարել է, որ դիտարկում է Լեհաստանում ամերիկյան մշտական ռազմակայան կառուցելու հնարավորությունը։