Թրամփը հազվագյուտ ընդունելության կարժանացնի Սի Ծինփինին՝ նրան կդիմավորելով «Էնդրյուս» ռազմաբազայում՝ ինքնաթիռի մոտ

Չինաստանի նախագահ Սի Ծինփինը, որը սեպտեմբերի 23-ին ավելի ուշ պետք է ժամանի Միացյալ Նահանգներ, հազվադեպ ընդունելության կարժանանա ԱՄՆ նախագահ Դոնալդ Թրամփի կողմից. վերջինս իր չինացի գործընկերոջը կդիմավորի Վաշինգտոնի մերձակայքում գտնվող «Էնդրյուս» բազայում։ «Արմենպրես»-ի փոխանցմամբ՝ այս մասին հաղորդում է The Associated Press գործակալությունը։

Նշվում է, որ Սի Ծինփինին ոչ թե Սպիտակ տանը, այլ կառամատույցում դիմավորելու Թրամփի որոշումը ցույց է տալիս, թե որքանով է ԱՄՆ նախագահը պատրաստվում պատվել Չինաստանի առաջնորդին, որը շուրջ 10 տարվա ընթացքում առաջին անգամ է պետական այց կատարում ԱՄՆ։

Թրամփը կմասնակցի ռազմաբազայում կայանալիք դիմավորման արարողությանը, որով կմեկնարկի Սի Ծինփինի եռօրյա այցը (սեպտեմբերի 23-25)։

Ըստ Fox News-ի՝ արհեստական ​​բանականությունը կլինի ԱՄՆ-Չինաստան գագաթնաժողովի քննարկման գլխավոր թեման։ Վարչակազմի պաշտոնյաներից մեկը, որի անունը չի նշվում, հայտնել է, որ կարող է քննարկվել նաև ոչ ռազմավարական ապրանքների մաքսատուրքերի հնարավոր նվազեցման վերաբերյալ համաձայնագիրը։ Աղբյուրը նաև նշել է, որ երկրի առաջնորդները կքննարկեն հազվագյուտ մետաղների արտահանումը և արտահանման հնարավոր վերահսկողությունը։ Ըստ հրապարակման՝ ակնկալվում է նաև, որ Թրամփը կճնշի Չինաստանին՝ ավելին անելու ֆենտանիլի արտադրության համար օգտագործվող քիմիական նյութերի արտահանումը զսպելու համար։