Թբիլիսիի կենտրոնում Ռուսաստանի քաղաքացի է սպանվել

Վրաստանի մայրաքաղաք Թբիլիսիի Բարաթաշվիլի անունը կրող կամրջի մոտ գտնվող այգում հայտնաբերվել է մոտ 40 տարեկան տղամարդու դի։

«Արմենպրես»-ի հաղորդմամբ՝ այս մասին հայտնում է Սպուտնիկ գործակալության վրացական ծառայությունը։

Նախնական տեղեկությունների համաձայն՝ զոհը բազմիցս դանակահարվել է։ 

«Տեղի բնակիչների խոսքով՝ սպանությունից կարճ ժամանակ առաջ տղամարդը վիճաբանել է սուպերմարկետում։ Վիճաբանությունից հետո մի քանի տղամարդ շարունակել են վիճաբանությունը դրսում»,-նշում է գործակալությունը։ 

Հաղորդվում է, որ տղամարդը Վրաստան է մտել օգոստոսի 26-ին։ 

Վրաստանի ներքին գործերի նախարարությունը քրեական գործ է հարուցել քրեական օրենսգրքի 108-րդ հոդվածով՝ «Կանխամտածված սպանություն»։ 

Աղբյուրի փոխանցմամբ՝ Ներքին գործերի նախարարությունը դեռևս չի հայտարարել որևէ կասկածյալի ձերբակալության կամ ինքնության մասին։