2 րոպեի ընթերցում
ԱՄՆ նախագահ Դոնալդ Թրամփը հայտնել է, որ Իրանի նկատմամբ վերջնական հաղթանակից հետո մտադիր է Հորմուզի նեղուցը հայտարարել Միացյալ Նահանգների տարածք։ Այդ մասին տեղեկացնում է «Արմենպրես»-ը՝ վկայակոչելով Deutsche Welle-ն։
Նյու Յորքի նահանգային ոստիկանության ակադեմիայում կայացած հանդիպման ժամանակ Սպիտակ տան ղեկավարը նշել է, որ Հորմուզի նեղուցը ներկայումս վերահսկվում է ԱՄՆ զինված ուժերի կողմից, որոնք շրջափակել են Իսլամական Հանրապետության նավահանգիստները։
Իրանի իշխանությունները նույնպես հայտարարում են, որ արգելափակել են նեղուցը, որտեղ նավագնացությունը խաթարվել է դեռևս փետրվարին՝ ԱՄՆ-ի և Իսրայելի կողմից Թեհրանի դեմ սկսված պատերազմի մեկնարկից ի վեր։
Թրամփը որևէ բացատրություն չի ներկայացրել Հորմուզի նեղուցը որպես ԱՄՆ-ի տարածք ներկայացնող իր հայտարարության վերաբերյալ, թեև Սպիտակ տան ղեկավարն ավելի վաղ պնդել էր, որ Իրանի հետ պատերազմը կարճատև կլինի։ Թրամփը նախկինում ընդգծել էր Գրենլանդիայի և Պանամայի ջրանցքի նկատմամբ վերահսկողություն հաստատելու Վաշինգտոնի ցանկությունը, ինչպես նաև Վենեսուելան անվանել էր ԱՄՆ-ի 51-րդ նահանգ։
Մեկնաբանելով Թրամփի հայտարարությունը՝ Իրանի արտաքին գործերի նախարարի տեղակալ Քազեմ Ղարիբաբադին ընդգծել է, որ Իսլամական Հանրապետությունը տեղի չի տա ԱՄՆ-ի սպառնալիքներին և ուժի ցուցադրմանը։