2 րոպեի ընթերցում
Գեղարքունիքի մարզի Գավառ քաղաքի Արծվաքար թաղամասի Զոհված ազատամարտիկներ փողոցի հիմնանորոգման աշխատանքների մեկնարկը տրվել է դեռևս հուլիսից՝ ՀՀ կառավարության կողմից 2026 թվականին իրականացվող սուբվենցիոն ծրագրերի շրջանակներում։
Ինչպես «Արմենպրես»-ին տեղեկացրին Գավառի համայնքապետարանի աշխատակազմից, ծրագրի պայմանագրային արժեքը կազմում է 111 միլիոն 186 հազար դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Գավառի համայնքապետարանը։ Ծրագրով նախատեսված է Գավառ քաղաքի Արծվաքար թաղամասի Զոհված ազատամարտիկներ փողոցի հիմնանորոգում՝ 1200 գծամետր երկարությամբ և 2050 քառակուսի մետր մակերեսով։
«Փողոցի շինարարությունն իրականցվում է ճանապարհաշինական համապատասխան չափորոշիչներով։ 20250 քմ մակերեսում առկա հիմքի քանդումից հետո կատարվել է ավազակոպճային նախաշերտի, խճային հիմքի տեղադրում, բիտումի տարածում և ասֆալտապատում։ Անհրաժեշտ հատվածներում տեղադրվել են նաև մետաղե ճաղավանդակներ և բետոնե ջրատարներ։ Նախատեսվում է նաև փողոցի գծանշում և կահավորում։
Գավառ քաղաքի Արծվաքար թաղամասի Զոհված ազատամարտիկներ փողոցի տարեց բնակիչներն անգամ այս փողոցում հիմնանորոգման աշխատանքների իրականացում չեն հիշում։ Բայց վերջին մի քանի օրերին այստեղ շինարարական եռուզեռ է: Շուրջ 1200 մետր երկարության փողոցի հիմնանորոգումը շուտով կավարտվի»,-ներկայացրին Գավառի համայնքապետարանի աշխատակազմից։