1 րոպեի ընթերցում
Եմենի հութիները հայտարարել են, որ լույս օգոստոսի 10-ի գիշերը վերստին հարվածներ են հասցրել Եմենի կառավարության կողմից վերահսկվող Ալ-Մոխա նավահանգստային քաղաքին, որը գտնվում է Կարմիր ծովի ափին՝ Բաբ էլ Մանդեբ նեղուցի մոտ: Ինչպես հաղորդում է «Արմենպրես»-ը, այդ մասին հայտնում է Al-Masirah հեռուստաալիքը։
Հութիները հայտարարել են, որ նոր հարձակումներով թիրախավորել են «սաուդյան հակառակորդի զորահավաքային կենտրոնները, զինապահեստները և Ալ-Մոխայում գտնվող օպերատիվ շտաբները»։
Հեռուստաալիքը ցուցադրել է մի քանի բալիստիկ հրթիռների և անօդաչու թռչող սարքերի արձակման կադրեր։
Կառավարության կողմից վերահսկվող Եմենի զինված ուժերը X սոցցանցում հաղորդել են ՀՕՊ-ի միջոցով դրոններ որսալու մասին։
«Հութիները գրոհների նոր ալիքով՝ բալիստիկ հրթիռների և անօդաչուների օգտագործմամբ, թիրախավորել են Ալ-Մոխայի բնակելի թաղամասերը։ ՀՕՊ համակարգերին հաջողվել է կալանել որոշ քանակությամբ դրոններ», - ասվում է հաղորդագրության մեջ։
Կառավարության տվյալներով՝ այդ հարձակումների հետևանքով զոհվել է 3 քաղաքացիական անձ և 4 զինվորական։