Սաուդյան Արաբիայի գործարաններից մեկում հրդեհի հետևանքով 16 աշխատանքային միգրանտ է զոհվել
1 րոպեի ընթերցում
Սաուդյան Արաբիայի մայրաքաղաք Ռիադում բազմոցների արտադրության գործարանում բռնկված խոշոր հրդեհի հետևանքով 16 բանգլադեշցի աշխատանքային միգրանտ է զոհվել։ Ինչպես հաղորդում է «Արմենպրես»-ը, այս մասին հայտնում է Reuters-ը։
Հրդեհը բռնկվել է օգոստոսի 9-ին՝ Մուսա Սանայա արդյունաբերական գոտում։
Բանգլադեշի արտաքին գործերի նախարարությունը հայտնել է, որ հետևում է իրավիճակին, իսկ Ռիադում Բանգլադեշի դեսպանատան պաշտոնյաները համագործակցում են Սաուդյան Արաբիայի իշխանությունների հետ՝ զոհվածների մարմինները հայրենիք տեղափոխելու անհրաժեշտ ձևակերպումներն ավարտելու ուղղությամբ։
Արտագաղթյալների բարեկեցության և արտերկրում զբաղվածության հարցերով նախարար Արիֆուլ Հաք Չոուդհուրին պաշտոնյաներին հանձնարարել է հնարավորինս արագ կազմակերպել զոհվածների մարմինների վերադարձը, ինչպես նաև ապահովել անհրաժեշտ պետական աջակցությունն ու փոխհատուցումը զոհվածների ընտանիքներին։
Մոտ 3.5 միլիոն բանգլադեշցի բնակվում է Սաուդյան Արաբիայում, որը շարունակում է մնալ բանգլադեշցի աշխատանքային միգրանտների գլխավոր ուղղությունը։ Անցած տարի նրանք հայրենիք են ուղարկել ավելի քան 2.7 միլիարդ դոլարի դրամական փոխանցումներ։